మదిలో మెదిలే భావతరంగాలు

కొలవేరి పాట ఎక్కడో విన్నట్టుందే??

2011-12-02T19:50:00.001-08:00

భారతదేశం మొత్తాన్నీ ఉర్రూతలూగిస్తున్న కొలవేరి పాటను మొన్న విన్నాను. వింటుంటే మధ్యలో (1:40 తర్వాత) ఈ కింది పాట గుర్తుకొచ్చింది. ఇది కాకతాళీయమా కాదా అన్నది మీరే చెప్పాలి.

ముత్యాల మడుగు

2010-11-18T19:39:00.001-08:00

బెంగళూరుకు చుట్టు పక్కల దగ్గరలో ఏదైనా విహార ప్రాంతం ఉందా అని అంతర్జాలంలో వెతికితే అనేకల్ తాలూకాలోని ముత్యాల మడుగు జలపాతం గురించిన సమాచారం కనిపించింది. జలపాతం గురించి బాగా ఊరిస్తూ చెప్పారు. సరే, అలా ఆటవిడుపుగా ఉంటుందని అక్కడికే వెళ్ళాలని నిర్ణయించుకున్నాం. ఇక Google mapsలో muthyala maduvu, anekal అని వెతికేసి, ఎలా వెళ్ళాలో దారి తెలుసుకొని ఓ రోజు ఉదయాన్నే బయలుదేరాము. Electronic city నుండి 22 కి.మి దూరం ఉంటుందని తెలిసింది.

హొసూరు రోడ్డు మీదుగా బయలుదేరాము. వెళ్ళేదారి కొద్దిగా ఇబ్బంది పెట్టినా వేగంగా ప్రయాణించేందుకు వీలుగా ఉంది. తొందరగానే ఆనేకల్ ఊరిని చేరుకున్నాము. అక్కడ కొద్దిగా గందరగోళ పడ్డా దారి అడిగి తెలుసుకుని ముందుకు సాగాము. సిటీ వాతావరణానికి దూరంగా, పచ్చగా, అహ్లాదకరంగా ఉన్న కొండలు కనిపించసాగాయి. వాటి వైపు చిన్న చిన్న పల్లెలను దాటుకుంటూ సాగాము. బెంగళూరు నుండి దాదాపు అరగంట ప్రయాణం తర్వాత ముత్యాల మడుగు చేరుకున్నాము. అక్కడ ఉన్న హోటలు, అంగళ్ళు అన్నీ మూసి ఉన్నాయి. దగ్గరలో ఎక్కడా జలపాతం జాడ కనిపించ లేదు. కొద్దిసేపు అక్కడే వేచి చూసి, అటుగా వచ్చిన గొర్రెల కాపరిని వివరాలడిగితే, శని, ఆదివారాలు మాత్రమే అక్కడ జనసంచారముంటుందని, మామూలు రోజుల్లో ఎవరూ ఉండరని, జలపాతానికి దారి చూపించాడు. మేమున్న చోటినుండి కింద లోయలోకి దిగాలట. కిందకు దిగటానికి మెట్లు ఉన్నాయి.

మెట్లు దిగుతుండగానే, చిన్నగా నీళ్ళు పారుతున్న చప్పుడు వినిపించసాగింది. చుట్టూ ఉన్న ప్రకృతిని చూస్తూ కిందకు దిగసాగాము.

చివరకు జలపాతాన్ని చేరుకున్నాము. ఇది పెద్ద జలపాతమేమీ కాదు. కానీ, పైనుండి పడుతున్న నీటి తుంపరలు ముత్యాల్లా కనిపిస్తాయి. కాబట్టే దీనికి ముత్యాల మడుగు అని పేరొచ్చిందట.

జలపాతానికి దగ్గరలోనే ఈశ్వరుని గుడి ఉంది. కాని గుడి మూసి ఉంది. అదీకాక వర్షాల వల్ల బండలన్నీ జారుడుగా ఉన్నాయి. అందువల్ల నీళ్ళను దాటుకుని వెళ్ళటం కుదరదని మా ఆవిడ ఆర్డసింది. ఏం చేస్తాం ఇంతే ప్రాప్తమనుకుని ఈ ఫోటో మాత్రం తీసి ఇంటికి బయలుదేరాము.

వర్షాలు బాగా పడటం వల్ల జలపాతంలో వర్షపు నీరు ప్రవహిస్తోంది. బహుశా వేసవిలో ఓ ఆదివారం వెళ్ళి రావటానికి ఈ ప్రదేశం బాగుంటుందనుకుంటాను. మరోసారి వెళ్ళినప్పుడు చూడాలి.

కామన్’వెల్త్’ ఆటలు

2010-09-11T21:16:00.001-07:00

ఈ ఆటల ఉద్దేశం ఏమైనా మన ప్రభుత్వం చేతకానితనాన్ని మాత్రం చాలా బాగా కళ్ళకు కట్టినట్లు చూడగలిగాము. సంవత్సరాల ముందే ఆటలు నిర్వహించాలని తెలిసినా, సరైన ప్రణాళిక లేకుండా చేసిన, చేస్తున్న పనుల నిర్వాకం వెగటు కలిగిస్తుంది. ఓ వైపు రాజకీయుల అవినీతి కంపు కొడుతుంటే మరోవైపు క్రీడాకారుల డోపింగ్ వ్యవహారం రోత కలిగిస్తోంది. రోజుకో క్రీడాంశంలో ఆటగాళ్ళు డోపింగ్ వల్ల నిషేధించబడుతున్నారు. ఆటలు ప్రారంభం కావటానికి కనీసం నెలైనా లేదు. ఇప్పటికీ మైదానాలు సిద్ధం కాలేదు. సిద్ధమైనవి నాసిరకపు నాణ్యతతో కట్టబడినవంటున్నారు. ఇంతటికీ కారణమైన వారిపై చర్యలు తీసుకోవటానికి సమయం సరిపోదని, అందువల్ల పెద్ద మనసు చేసుకుని ఎలాగోలా సర్దుకుపొమ్మని, ఆటలైపోయిన తర్వాత తగిన చర్యలుంటాయని మన ప్రభుత్వపు మాట. అంతా అయిపోయిన తర్వాత చేసేదేమిటో నాకర్థం కాలేదు. ప్రజా ధనాన్ని అడ్డంగా దోచుకున్న వారిని వెంటనే బంధించి, తగిన శిక్ష వేయకుండా, వారి చేతుల్లోనే మనదేశ గౌరవముందని, ఎలాగూ ఇప్పటివరకు ఇంత మోసపోయారు, ఇంకొంతకాలం వీరిని భరించి మరికొంత మోసపొమ్మని దేశ ప్రజలకు చెప్పగల అధినేతలు ఉండటం మన దురదృష్టం. ఇంత జరిగాక కాపాడుకోవాటానికి ఇంకా ప్రపంచం దృష్టిలో గౌరవం మిగిలి ఉందనుకోను. మణిశంకర్ అయ్యర్ చెప్పినట్లు ఆటలు విఫలమై ప్రపంచం ముందు తల దించుకోవలసిన సమయం వస్తుందేమోనని భయం వేస్తుంది. అవినీతికి కూడా ఓ హద్దు ఉండాలి. లేకపోతే సమాజం చెదలు పట్టిన మహా వృక్షంలా కుప్పకూలుతుంది. అంతా చేసుకున్న ఖర్మ.

క్విబెక్ జాతీయ దిన సంబరాలు -2

2009-07-26T06:06:00.001-07:00

పరెడ్లో భాగంగా వచ్చిన గుర్రబ్బండి. ఈ గుర్రాలు చలి ప్రాంతాలలో ప్రయాణానికి అనువుగా ఉంటాయి.

మాంట్రియాల్ కెనిడియన్స్ అనేది మా ఊరి ఐస్ హాకీ టీము. వారి ప్రదర్శన ఇది.

పరేడ్లో వచ్చిన వింటేజ్ కార్లు.

ఇలాంటి సైకిలు గురించి పుస్తకాల్లో చదివానేగానీ నిజంగా చూడటం మాత్రం ఇప్పుడే.

ISKCON వాళ్ళు కూడా పరేడ్లో పాల్గొన్నారండోయ్!!

పరేడ్ చివరగా ఒక పెద్ద పార్కు చేరుకున్నది. ఇక్కడ ఇక పాటల కచేరికి ఏర్పాట్లు సిద్ధం చేసుకుంటున్నారు. ఇక అర్థరాత్రి వరకు పాటలు పాడి జనాన్ని అలరిస్తారు. మేము మాత్రం అక్కడే ఉన్న స్టాల్లను తిరిగి చూసి, కాసేపు కార్యక్రమాలు చూసి చీకటి పడుతుండగా ఇంటికి తిరిగి వచ్చాము.

మాకు మాత్రం మరో శెలవు రోజు సరదాగా గడిచిపోయింది.

క్విబెక్ జాతీయ దిన సంబరాలు

2009-07-12T18:20:00.001-07:00

క్విబెక్ జాతీయ దిన సంబరాల్లో పాలు పంచుకునే అవకాశం ముచ్చటగా మూడోసారి వచ్చింది. మొదటి సారి చిన్న పల్లెలో జరిగిన సంబరాల్లో పాల్గొంటే, కిందటి సంవత్సరం ఓ పట్టణంలో పాల్గొన్నాము. (పాత టపాలల్లో వాటి ఫోటోలు, వీడియోలు చూడవచ్చు). ఈ సంవత్సరం మాంట్రియాల్ నగరంలో జరిగే పెరేడ్ చూసే అవకాశం దొరికింది. వాటి ఫోటోలు చూసి ఎలా ఉన్నాయో చెప్పండి.

పరెడ్ ప్రారంభ దృశ్యం.

సంప్రదాయ వస్త్రధారణ.

ప్రసిద్ధ వ్యక్తుల పెద్ద బుట్ట బొమ్మలు. మనవైపు ఇలాంటి బొమ్మలు కనుమరుగవుతుంటే ఇక్కడ ప్రతి సంవత్సరం కొత్త బొమ్మలను తయారు చేస్తున్నారు.

సంగీతం లేని సంబరాలను ఇక్కడ ఊహించనుకూడాలేము. ఆధునిక సంగీతాన్ని ఆహ్వానిస్తూనే సంప్రదాయక సంగీతాన్ని కూడా ఆస్వాదించటం చూడ ముచ్చటగా ఉంటుంది.

సంగీతమేకాదు శౌర్యమూ మా స్వంతమే.

పరెడ్లో పాల్గొంటున్న వివిధ సంస్థల కళాకారులు, క్రీడాకారులు...

క్విబెక్లో స్థిరపడ్డ చైనీయులు తమ వంతుగా చేసిన ప్రదర్శన.

వీటి గురించి కొత్తగా చెప్పాలా?

ఇక నృత్యకారుల వంతు.

చీర్ లీడర్స్ ల ప్రదర్శన.

మిగిలిన ఫోటోలు తర్వాతి టపాలో. ఫోటోలు ఎలా ఉన్నాయో చెప్పటం మరవకండి.

సెంటు మాలక్ష్మి

2009-06-21T18:19:00.001-07:00

పేరు చూసి ఇదేదో అత్తర్ల గురించి టపా అనుకునేరు. కాదండి, ఇది హండ్రెడ్ పర్సెంటు కెనెడియన్ డాలరులో వందో వంతైన సెంటు గురించే. కెనడా వచ్చిన కొత్తలో ఇత్తడి నాణెంలా ఉండే సెంటు పరిచయమైయ్యింది. ఇక్కడ అందరూ ’సరైన చిల్లర’ ఇచ్చి పుచ్చుకునేవారవటం చేత ఈ నాణెం వాడుకలో ఉంది. ఇది కేవలం సరైన చిల్లర ఇవ్వటానికే తప్ప మామూలు నాణెల్లా వాడలేమన్న సంగతి తెలుసుకునేసరికి నా చొక్కా, పాంట్ల జేబుల నిండుగా నిండిపోయింది. వీటిని నాణెల్లా కేవలం మనుషులు మాత్రమే గుర్తిస్తారు కానీ వెండింగ్ మెషిన్లు వీటి మింగేయటమో, ఉమ్మేయటమో చేస్తాయి. ఇది తెలుసుకునేసరికి కొన్ని నాణేలు చేజారిపోయాయి. పోనీ బస్సులో వాడుదామని బస్సెక్కి గుప్పిల్లతో నాణేలు మెషిన్లో పోస్తుంటే డ్రైవరు ముందు విస్తుపోయి తర్వాత చిద్విలాసంగా నవ్వి, ’నీ నాణేలు మా బస్సు కంపెనీకి డొనేట్ చేసావు పో’ అని చావు కబురు చల్లగా చెప్పి పుణ్యం కట్టుకున్నాడు. అలా చిల్లర ఏ గుడి మెట్ల దగ్గర పోసినా బోలెడంత పుణ్యం దక్కేది. ఇక్కడ పుణ్యమూ పోయె, పురుషార్థమూ పోయెనని వగచుచూ.... (బాబోయ్.. జరిగిన నష్టాన్ని తలుచుకుంటే గ్రాంథికం వచ్చేస్తోంది). ఇలా వేర్వేరు దారుల్లో బోలెడన్ని నాణేలు నష్టపోయాక, ఇంకేం చేయాలో తోచక సెంట్లను కూడబెట్టడం ప్రారంభించాను. ఇలా కూడబెట్టిన నాణేలతో ఒక పెద్ద సంచి నిండాక..... వంట బాగా కుదిరిన రోజున మా ఆవిడలు ఓ వంద వరహాలు (అదేనండి సెంట్లు) బహుమతి ఇవ్వటం, తనకు షాపింగ్లో నసగకుండ సహాయం చేసినప్పుడు తను నాకు ఓ యాభై వరహాలు (ఎంతైనా మా ఆవిడ పతిసేవకు (పతిసేవ అంటే... పతికి చేసిన సేవకాదు, పతి చేసిన సేవ... కాలం మారింది బాబులు) సరిగ్గా విలువ కట్టగలదు) బహుమతిగా ఇచ్చిపుచ్చుకునే అలవాటు చేసుకున్నాము. అందువల్ల ఇప్పుడు ఇద్దరిదగ్గర చెరో పెద్ద సంచెడు వరహాలు పోగుబడ్డాయి.

మొన్న ముసురు పట్టి వాతావరణం చల్లగా ఉన్నప్పుడు వేడివేడి మిరపకాయ బజ్జీలు తినాలనిపించింది. సీరియస్సుగా ఇంగ్లీషు సీరియల్ చూస్తున్న మా ఆవిడని చూస్తూ, ’ఇలా ముసురు పట్టి ఉన్నప్పుడు బజ్జీలు తింటే చాలా బాగుంటుంది కదా? నీవిప్పుడు బజ్జీలు వేసి పెడితే నీకు కాసుల పేరు చేయిస్తానే’ అని అన్నాను. మూతి ముప్ఫై వంకరలు తిప్పి ’పెళ్ళైన ఇన్నేళ్ళలో ఒక్క నగా చేయించ లేదుగానీ ఇప్పుడు బజ్జీల కోసం కాసులపేరు చేయిస్తారా?... అయినా కాసులెక్కడ ఉన్నాయో కాసులపేరు కోసం’ అంది ఎకసెక్కంగా. ’మనక్కాసుల కరువేంటి? ఇదిగో సంచుల కొద్ది ఉంటేనూ...’ అంటూ సెంట్ల సంచికేసి చూపించాను. ఆ సాయంత్రం ప్లేట్లో వేడి బజ్జీలతో పాటు అంతకంటే వేడిగా నెత్తి మీద మొట్టికాయలు తినాల్సి వచ్చింది. హాస్య ప్రియత్వం అనేది అందరికీ ఉండదు కదండీ ?!

(ఇది కేవలం తమాషాకు వ్రాసింది. మా ఆవిడ చాలా మంచిది. కేవలం బజ్జీలు మాత్రమే పెడుతుంది.)

ఓ సాయంకాలపు ఫోటోలు

2009-06-20T10:17:00.001-07:00

మా ఊళ్ళో వేసవి సాయంకాలాలు భలేగా ఉంటాయి. రాత్రి 9 దాటినా వెలుగు ఉండటం పైగా ఉష్ణోగ్రత కూడా అనుకూలంగా ఉండటం వల్ల సాయంత్రాలు బయటే గడపటానికి ఇష్టపడతాము. అదే చలికాలం అయితే సాయంత్రం 4 గంటలకే చీకటి పడి మోకాలి ఎత్తున మంచులో కాళ్ళీడుస్తూ నడవలేక ఇంట్లోనే సమయాన్ని గడపాల్సి వస్తుంది. సరే, అప్పటి సంగతి ఎందుకుగానీ, ఈ ఫోటోలు చూడండి.

ఇది రాత్రి 8 గంటలప్పుడు మా వీధి.

రాత్రి 8 దాటినా ఇంకా అస్తమించని సూర్యుడు.

రాత్రి 9 గంటల సమయం.

Space Race పుస్తక పరిచయం

2009-04-26T05:31:00.001-07:00

Space Race పుస్తకాన్ని మీకు పరిచయం చేయటం కోసమే ఈ టపా. అంతరిక్షయాణాన్ని, తద్వారా చంద్రుణ్ణి తాకాలని కలలు కనే ఇద్దరు రాకెట్ ఇంజనియర్ల జీవిత చిత్రణే ఈ పుస్తకం.

ఒకరు జర్మన్ ఇంజనియరైన వెర్నెర్ వాన్ బ్రౌన్. ఈయన రెండవ ప్రపంచ యుద్ధకాలంలో హిట్లరు కోసం రాకెట్లను తయారుచేసేవాడు. గొప్ప గొప్ప రాకెట్లను తయారు చేసి తద్వారా అంతరిక్షాణ్ణి, తర్వాత చంద్రుణ్ణి, తదనంతరం సుదూర గ్రహాలకు ప్రయాణించాలనేది ఈయన కల. ఆ కలను సాకారం చేసుకోవాలంటే తగిన వనరుల కోసం హిట్లరు నాజీ సైన్యానికి సహాయపడక తప్పదు. రాకెట్ల ద్వారా బాంబులను లండనుపై కురిపించవచ్చనే ఉద్దేశంతోనే హిట్లరు రాకెట్ల అభివృద్ధిపై మక్కువ చూపిస్తాడు. కానీ యుద్ధంలో పరిస్థితి తలక్రిందులై హిట్లరు ఆత్మహత్య చేసుకున్న తర్వాత వాన్ బ్రౌన్ అమెరికా వెళ్ళి తన కలను నిజం చేసుకుంటాడు.

యుద్ధ పరిస్థితులను, concentration campల్లోని ఖైదీలను బానిసలుగా వాడుకుంటూ రాకెట్లని తయారుచేసే భూగర్భ కర్మాగారాలను, వాటిలో ఖైదీల నిస్సహాయ పరిస్థితులను, గంపగుత్తగా వారిని నిర్మూలించే అధికారుల హేయ కృత్యాలను కూడ రచయిత్రి ఈ పుస్తకంలో చిత్రీకరిస్తారు. అప్పటి ప్రపంచ పరిస్థితులను కళ్ళకు కట్టినట్లు చిత్రీకరిస్తారు. జర్మనీ రాకెట్ విఙ్ఞానంలో తమకన్నా దశాబ్దాలు ముందుందన్న విషయం తెలిసి యుద్ధానంతరం జర్మని ఇంజనియర్లను తమ దేశానికి ఆహ్వానించి, వారితో తమ పనికాగానే వారిని నిర్లక్ష్యం చేసిన రష్యా, తమని నమ్మి తమ దేశానికి వచ్చిన జర్మన్ ఇంజనియర్లకు తగిన అవకాశాలను కల్పించకుండా సంవత్సరాలు అలక్ష్యం చేసిన అమెరికా వైఖరులను, వాటి వెనుకనున్న రాజకీయ కారణాలను రచయిత్రి వివరిస్తారు. తద్వారా ఈ పుస్తకం కేవలం ఒక చరిత్ర గ్రంథంలా కాకుండా ఒక నవలలా చదివిస్తుంది.

చంద్రుణ్ణి చేరుకోవటానికి బ్రౌనుకు సమ ఉజ్జీగా, అంతరిక్షానికి మనిషిని పంపేవరకు పందెంలో ముందున్న రష్యా రాకెట్ ఇంజనీయరుగా సెర్గి పావ్లొవిచ్ కొరొలెవ్ మనకు పరిచయం అవుతాడు. ఒకపక్క బ్రౌన్ ప్రపంచమంతటికీ కనిపిస్తూ, అందరికీ తెలిసిన వ్యక్తిగా మసులుతుంటే, కొరొలెవ్ పేరు మాత్రం ఎక్కడా బయటకు రాకుండా అప్పటి రష్యా ప్రభుత్వం జాగ్రత్తలు తీసుకుంది. బ్రౌన్ లాగానే రాకెట్లను కేవలం తమ సైనిక అవసరాలకు వాడుకోజూసే ప్రభుత్వాలకు సేవ చేస్తూనే తన కలను నిజం చేసుకునేందుకు కొరొలెవ్ చేసిన పోరాటం అచ్చెరువు కలిగిస్తుంది. ఈయన తన జీవిత తొలిదశలో దేశద్రోహిగా నేరం ఆరోపించబడి సంవత్సరాలపాటు ఖైదీగా బంధించబడి, కఠిన శారీరిక శ్రమ చేయవలసి వస్తుంది. జైలునుండి కేవలం రాకెట్లను నిర్మించటానికి బయటకు తీసుకురాబడతాడు. అప్పటికే కుటుంబం చిన్నాభిన్నం అయిపోయుంటుంది. అయినా తన కృషిని కొనసాగిస్తాడు. మానవ జీవనానికి ఏ మాత్రం సహకారి కాని ఎడారి ప్రాంతంలో రాకెట్లను నిర్మిస్తూ రేసులో రష్యాకు తిరుగులేని ఆధిక్యాన్ని సంపాదించి పెడతాడు. కొరొలెవ్ జీవితం చాలా స్ఫూర్తిని కలిగిస్తుంది. ముఖ్యంగా యురి గగారిన్ ను అంతరిక్షంలో మొదటి మనిషిగా పంపే ఘట్టం మాత్రం చాలా ఆసక్తి కలిగిస్తుంది.

మీకు ఆసక్తి ఉంటే తప్పక చదవవలసిన పుస్తకం. ఈ పుస్తకంలోని కొన్ని పుటలను ఇక్కడ చూడవచ్చు.

ఎన్నికలొచ్చాయి

2009-04-05T14:28:00.001-07:00

ఎన్నికల జాతర మళ్ళీ మొదలయ్యింది. పగటి వేషగాళ్ళు, గారడీగాళ్ళు, మాటల పోటుగాళ్ళు జాతరను రక్తి కట్టిస్తున్నారు. హామీలు, వాగ్దానాలతో ఓటరు దేవుణ్ణి స్తుతించి మద్యం, డబ్బులతో అతన్ని ప్రసన్నుణ్ణి చేసుకోవటానికి ప్రయత్నాలు జరుగుతున్నాయి. మొత్తానికి తగిన నాయకుణ్ణి ఎన్నుకోవటమనే ప్రక్రియ జోరందుకుంటున్నది. ఈ టపాలో కేవలం నా అభిప్రాయాలను మాత్రం పంచుకుంటున్నాను.

నాయకుడనే వాడు తన జాతికి దిశా నిర్దేశం చేస్తూ, శతాబ్దాల పాటు దేశానికి మంచి జరిగేలా ప్రణాళికలను రచించి అమలుపర్చేవాడై ఉండాలనేది నా అభిప్రాయం. ఇప్పటి రాజకీయులలో అలాంటి నాయకులు ఉన్నారనే నమ్మకం నాకు లేదు. యువతరం నాయకులు కూడా దొందు దొందేననిపిస్తున్నారు. ప్రజలను మభ్య పెట్టడంలో పెద్దవారికన్నా రెండాకులు ఎక్కువే చదివారు. వీరందరి తీరు చూస్తుంటే కేవలం ఈ ఎన్నికలు గట్టేక్కితే చాలాన్నట్లున్నది. ఎంతసేపూ అది ఉచితం, ఇది ఉచితం , ఊరకే డబ్బులిస్తామనేవారేగానీ దేశాన్నిగానీ, రాష్ట్రాన్నిగానీ ఎలా అభివృద్ధి పథంలో నడిపిస్తారో ఎవరూ చెప్పటం లేదు. వీరు ఉచితంగా ఇచ్చే వరాల మీద ఆధారపడి లేని నా ఓటును వారికే ఎందుకివ్వాలో ఏ నాయకుడూ చెప్పటం లేదు. సామాజిక న్యాయం, పేద ప్రజలను ఉద్దరిస్తామనే వాదనకు నా వద్ద విలువ లేదు. ఎవరికివారు తమ స్థితి మెరుగుకావటానికి కష్టపడి ప్రయత్నించాలి. దానికి సమాజంలో అందరికీ సమాన అవకాశం ఉండేలా పరిపాలన ఉండాలి. అంతేగానీ అన్నీ పళ్ళెంలో పెట్టి అందిస్తామని పార్టీలు చెప్పటం తగదు. పోనీ ఆ వాగ్దానాలను ఎలా నెరవేరుస్తారో, అందుకు వనరులు ఎక్కడ ఉన్నాయో ఎవరూ చూపటం లేదు, చెప్పటం లేదు. ఇలాంటి నాయకమన్యులే తప్ప నిజమైన నాయకులెవరూ ఇప్పటివరకూ రంగంలో రాకపోవటం చాలా నిరాశ కలిగిస్తున్నది.

బరిలో ఉన్న అభ్యర్థులందరినీ నిరాకరించే వీలున్నప్పుడే ఓటు వేయాలనే అభిప్రాయాన్ని మార్చుకుని ఈ సారి ఓటు వేయడానికి నిర్ణయించుకున్నాను. అందుకు కారణం ఇక్కడ ప్రజాతంత్రం ఎలా పనిచేస్తుందో, అందులో ప్రజల పాత్రేమిటో చూసాను. భారతదేశంలో ఉన్నది అచ్చమైన ప్రజాస్వామ్యనే భ్రమ తొలిగిపోయింది. ప్రజాస్వామ్యమనేది ఒక పరిణితి చెందిన సమాజం అనుసరించే పరిపాలనా విధానం. అలా పరిణితి సంతరించుకోని దేశాలు ప్రజాస్వామ్యాన్ని నియంతృత్వపు పోకడలతోనో, రాచరికపు హంగులతోనో, మంద బలంతోనో అనుసరిస్తాయి. మన దేశంలో నడుస్తున్నది అలాంటి పరిపాలన వ్యవస్థే. ఇందులో ప్రజల పాత్ర కేవలం ఓటు వేయటం వరకే పరిమితం. తర్వాత పరిపాలనా వ్యవహారాలలో ప్రజలది కేవలం ప్రేక్షక పాత్ర మాత్రమే. కనీసం ఆ పరిమిత పాత్రనైనా పోషించటానికి ఈ సారి ఓటు వేద్దామని నిర్ణయించుకున్నా.

ఇక నా ఓటు ఎవరికి అన్న విషయంలో 35% ఆ పార్టీ సిద్ధాంతాలు, ప్రణాళికలు పాత్ర వహిస్తే, 50% అభ్యర్థి గత చరిత్ర, ఇంతకు ముందు అతని పనితనం ప్రభావం చూపిస్తాయి. ఒకవేళ అభ్యర్థి కొత్తవాడైయుంటే అతను తన నియోజకవర్గానికి ఎలాంటి సేవ చేయబోతున్నాడో, దానికి ఎలాంటి పద్ధతులు అవలంబిస్తాడన్న విషయంపై ఆధార పడుతుంది. ఇక మిగిలిన 15% అతని వ్యకిగత జీవితం, అతని విద్యార్హతలు, అతని మాట, పని తీరుపై ఆధార పడతాయి. ఇంకా ఏమైనా విషయాలు మర్చిపోయుంటే గుర్తు చేయండి. అలా నా ఓటు తీసుకునే అభ్యర్థి కనీసం పాసు మార్కులు (35%) పొందినవాడై ఉండాలని దేవుణ్ణి ప్రార్థిస్తూ శెలవు తీసుకుంటున్నాను.

స్టార్ ఆఫీసులో తెలుగు

2009-03-08T10:40:00.001-07:00

మైక్రొసాఫ్ట్ ఆఫీసుకు బదులుగా స్టార్ ఆఫీసు లేదా ఒపన్ ఆఫీసు వాడేవారికి వాటిల్లో తెలుగులో వ్రాయటానికి ఇబ్బందైతే చిన్న చిట్కా ద్వారా దాన్ని అధిగమించవచ్చు. నేను స్టార్ ఆఫీసును వాడుతున్నాను. (గూగుల్ ప్యాకుతో చాలా రోజుల క్రితం download చేసుకున్నాను. ఇప్పుడు గూగుల్ ప్యాకుతో దొరకటం లేదు. పైగా ఫ్రీ కూడా కాదు. ఒపన్ ఆఫీసు ఇప్పటికీ ఫ్రీగా download ఇక్కడి నుండి చేసుకోవచ్చు.)

సరే చిట్కా ఏమిటంటే,

1. ముందుగా ఏదైనా unicode తెలుగు fontను ఎన్నుకోవాలి. విండోసులో గౌతమి (Gautami) అనేది తెలుగు చూపించడానికి వాడే font. పోతన, వేమన లాంటి fonts కూడా బాగా పనిచేస్తాయి.

2. తర్వాత Insert -> Special Character నుండి తెలుగును subset ద్వారా ఎన్నుకోవాలి.

3. BarahaIME ద్వారా శుభ్రంగా తెలుగును టైప్ చేసుకోవచ్చు.

4. పాయింటు 2 తో వేరే వేరే భాషలను ఎన్నుకుని తర్వాత బరహతో సదరు భాషలో టైప్ చేసుకోవచ్చు. మీరే చూడండి.

Star office Writerలో వివిధ బాషలు.

ఇతర స్టార్ ఆఫీసు అప్లికేషన్లలో కూడా తెలుగు వాడవచ్చు. ఉదాహరణకు Microsoft excelకు సమానమైన Star office calcలో తెలుగు వాడకం.

పైరెటెడ్ ఆఫీసుతో తంటాలు పడకుండా దాదాపు సంవత్సరంపైనే స్టార్ ఆఫీసు వాడుతున్నాను. మీరు ప్రయత్నించండి.

శీతాకాలపు జాతర - 3

2009-02-28T04:29:00.001-08:00

జాతరలో అడుగుపెట్టగానే మనకు దర్శనమిచ్చేవి మంచుతో నిర్మించిన కళాఖండాలు.

ఇలాంటి మంచు శిల్పాలకు కొదువే లేదు. ఇవే కాకుండా పిల్లలు ఆడుకోవటానికి అనేక రకమైన ఆటల శిబిరాలు ఏర్పాటు చేసారు. వీటిలో వీడియో గేములు ఆడే శిబిరం చాలా రద్దీగా ఉండటం భవిష్యత్తులో ఇలాంటి జాతరలు కనుమరుగయ్యే ప్రమాదానికి సూచిక. ఇంట్లో ఒంటరిగా ఇవే ఆటలు ఆడే పిల్లలు బయట నలుగురిలో వచ్చినప్పుడు కూడా అవే ఆటలు ఆడటానికి మక్కువ చూపటం, దానికి పెద్దవాళ్ళు అవకాశం కల్పించటం నిరాశ కలిగించింది. ఇక ఆరుబయటి ప్రదేశాలలో ఆడే మంచు ఆటలకు ఇక్కడ లోటేమీ లేదు. చిన్న పిల్లల జారుడు బండను ఒక కోటలాగ కట్టారు.

కుక్కలు లాగే స్లెడ్జి బండి. మంచు మీద వెళ్ళటానికి అనువైన వాహనం.

మంచు మీద వెళ్ళే జీపులాంటి వాహనం. ఇవేకాకుండా మంచు మీద వెళ్ళే మొబైకులు కూడా ఉన్నాయి. ఈ బైకుల మీద జాతరలో చక్కర్లు కొట్టవచ్చు కూడా.

మంచు మీద రాఫ్టింగ్ ఆట. మేము కూడా ఆడాము. ఇవే కాకుండా ఇంకా కొన్ని మంచు రైడ్లు కూడా ఉన్నాయి. వాతావరణం -8 డిగ్రీలతో, ఈదరు గాలులకు ముఖమంతా ఎర్రగా అయిపోతున్నా, మంచు మీద జారి పడుతున్నా పట్టించుకోకుండా సంబరాల్లో పాలు పంచుకుంటున్న జనాలను చూస్తే ఇక్కడ శీతాకాలాన్ని కూడా బాగా ఎంజాయ్ చేస్తారనిపించింది.

మంచు మీద వెళ్ళే గుర్రబ్బండి. ఈ బండి మీద కూడా షికార్లు చేయవచ్చు.

సాయంత్రం చీకటి పడుతుండగా తిరిగి మా ఊరికి బయలుదేరాము. ఇంతకీ మా టూరు ఎలా ఉందంటారు?

శీతాకాలపు జాతర -2

2009-02-20T14:19:00.001-08:00

ఈ హోటల్లో తినడానికేమీ దొరకదు కానీ తాగడానికి మాత్రం అన్నీ దొరుకుతాయి. విశేషమేమిటంటే తాగడానికి ఉపయోగించే గ్లాసులు కూడా మంచుతోనే తయారుకావటం. ఇది ఐస్ హోటల్లోని బారు. మందుబాబుల సందడి ఇక్కడ చాలా ఎక్కువ.

మందు తాగే అలవాటు లేనివారికి శీతల పానీయాలు, జ్యూసులు, కాఫీలు అందించే కౌంటరు.

ఐస్ హోటలుకు ఆధారంగా నిలిచిన స్థంభాలు.

రేయ్... ఎవర్రా?? నా ఫోటో హాలు మధ్యలో పెట్టింది. పిల్లలు దడుచుకుంటారు. తీసేయండి.

ఇది కేవలం బస కోసం ఏర్పాటైన హోటల్ మాత్రమే కాదండోయ్.. ఈ హోటల్లో పెళ్ళి చేసుకోవాలనుకునే వారి కోసం ఒక చాపెల్ కూడా నిర్మించారు. దాని లోపలి దృశ్యం. పెళ్ళి చూడటానికి వచ్చిన ఆహుతులు కూడా మంచు దిమ్మలపై ఆసీనులు కావలసిందే.

సరే, ఐస్ హోటలు చూసి ఇక శీతాకాలపు జాతర (Winter Carnival) చూడటానికి బయలుదేరి క్వీబెక్ నగరం చేరుకున్నాము. ముందుగా క్వీబెక్ నగరపు అబ్జర్వేటరీ టవరు చేరుకున్నాము. క్వీబెక్ నగరాన్ని ఇంతకు ముందే చూసి ఉన్నా శీతాకాలంలో ఎలా ఉంటుందో చూడాలన్న కుతూహలమే మరోసారి ఈ టవరు ఎక్కేలా చేసింది. ఇదే ఆ అబ్జర్వేటరీ టవరు.

ఇక ఆ టవరు పైనుండి క్వీబెక్ నగరాన్ని చూస్తే అబ్బురమనిపించింది. మీరేమంటారు?

క్వీబెక్ అంటే స్థానిక ఇండియన్ల భాషలో ’నది ఇరుకుగా మారిన ప్రదేశం’ అని అర్థమట. ఇక్కడ సెయింట్ లారెన్సు నది ప్రవాహం ఇరుకుగా మారుతుంది. మీకు కనిపిస్తున్నది గడ్డ కట్టిన ఆ నదే. క్వీబెక్ నగరం పూర్వం చాలా ప్రసిద్దిగాంచిన రేవు పట్టణమట. యూరపు నుంచి అమెరికా వచ్చే చాలా సరకు ఓడలు ఇక్కడే వ్యాపార వ్యవహారాలు నిర్వహించేవట.

ఇదే జాతర జరుగుతున్న స్థలం. ఇక్కడి చిత్రాలు తర్వాతి టపాలో.

భారతీయ రైల్వేవారి భారత దర్శనం

2009-02-18T17:38:00.001-08:00

మొన్నటి ఆదివారం ఈనాడులో పేదవారి ప్యాలెస్ ఆన్ వీల్స్ అని, కేవలం పది రోజుల్లో ఐదు వేలకే (అన్ని ఖర్చులు కలిపి) పది రాష్ట్రాలను సందర్శించవచ్చని చెపితే చూద్దామని రైల్వే టూరిజంవారి websiteకు వెళ్ళాను. ఒక్క రైలు తప్పించి అన్ని రైళ్ళు ఉత్తర భారతం నుండి ప్రారంభం అవుతున్నాయి. ఇక దక్షిణ భారతంలో మదురై నుండి బయలుదేరే రైలు వివరాలు ఇలా ఉన్నాయి. 15 రోజుల యాత్రకు 7,732 రూపాయలు టికెట్టు ధర. రైలు కేరళ, తమిళనాడులోని ప్రముఖ పర్యాటక ప్రదేశాలు, హైదరాబాదు, హరిద్వార్, వారణాసి, కోల్కతా, పూరి, కోణార్కు, భువనేశ్వర్ల మీదుగా తిరిగి మదురై చేరుకుంటుందని వివరాలు ఉన్నాయి. ఇక రైలు ప్రయాణ వేళాపట్టిక చూద్దామని ఈ లంకె నొక్కాను.

పట్టిక చూసాక నాకర్థమైంది ఇదీ. మదురైనుండి బయలుదేరిన రైలు రెండున్నర రోజులపాటు తిరువనంతపురంతో పాటు కేరళలోని అన్ని పర్యాటక ప్రదేశాలమీదుగా, తమిళనాడులో తిరిగి ప్రవేశించి హైదరాబాదు చేరుకుంటుంది. మధ్యలో ఎక్కడా పట్టుమని పదిహేను నిముషాలు కూడా ఆగదు. కేవలం ప్రయాణికులను ఎక్కించుకుంటుంది కాబోలు. హైదరాబాదులో బసతో నిజంగా టూరు ప్రారంభమవుతుంది. వెనుదిరిగేటప్పుడు భువనేశ్వర్ తో అంతం అవుతుంది. తిరిగి 2 రోజులు ప్రయాణికులను వారి వారి ఊళ్ళలో దించటానికి సరిపోతుంది. అంటే మొత్తం 15 రోజులలో 4 రోజులు కేవలం రైలులో ప్రయాణానికే సరిపోతాయి. అంటే పత్రికల్లో ప్రకటించినట్లు రోజుకు 500 కాదు 700 ఖర్చవుతాయి. మొత్తం మీద 2000 అదనపు ఖర్చు. కేవలం ప్రయాణికులను ఎక్కించుకోవటానికి 5 - 10 నిమిషాలు ఆగే ఊళ్ళ పేర్లను కూడా సందర్శించే ప్రదేశాల పేర్లతో కలిపేయటం ప్రజలను తప్పు దారి పట్టించటం కాదా? ఇంకో విశేషమేమిటంటే రైలు రూటులో చెన్నై పేరుందిగానీ వేళాపట్టిలో చెన్నై పేరే కనిపించదు. బహుశ చెన్నైను రైలు దిగకుండానే చూపిస్తారనుకుంటా. పనిలో పనిగా తిరుపతి వెంకన్నను కూడా రైల్లోనుండే చూపించేస్తే ఓ పనైపోయేది.

శీతాకాలపు జాతర - 1

2009-02-15T17:13:00.001-08:00

ఈ శనివారం మేము క్వీబెక్ నగరంలో జరిగే శీతాకలపు జాతరలో పాల్గొనటానికి మరియు ఐస్ హోటల్ సందర్శించటానికి వెళ్ళాము.

ఐస్ హోటళ్ళను కేవలం మంచుతో నిర్మిస్తారు. హోటల్లో అన్నీ మంచు ఖండాలతోనే తయారు చేస్తారు. శీతాకాలంలో బాగా చలి వాతావరణం ఉండే దేశాలలో ప్రతి సంవత్సరం కొత్త కొత్త థీంలతో ఇలాంటి హోటళ్ళను సందర్శకుల కోసం నిర్మిస్తుంటారు. క్వీబెక్ ఐస్ హోటల్లో బస చేయటం చాలా ఖరీదైన వ్యవహారం. ఒక్క రాత్రి బసకు ఒక్కరు 300 డాలర్లు సమర్పించుకోవాలట. ఆ ఐస్ హోటల్ ఫోటోలను ఇక్కడ ఉంచుతున్నాను.

ఈ ఐస్ హోటల్లో మొత్తం 40 గదులు ఉన్నాయి. కొన్ని సూట్లలో గోడలపై ఇలాంటి మంచు కళాఖండాలు చెక్కి ఉంటాయి. మామూలు గదులు కేవలం మంచం, కుర్చీ, మేజులతో సాదాసీదాగా ఉంటాయి.

గదుల్లో మంచాలు కూడా మంచువే. అయితే వాటిపైన పడుకోవటానికి పరుపులు మాత్రం మామూలువి. లేకపోతే ఒక రాత్రి మంచు దిమ్మెలపై పడుకుంటే బిగుసుకుపోవటం ఖాయం.

హోటల్ హాలు దృశ్యం.

హాలు మధ్యలో వేలాడుతున్న దీపపు గుత్తి. ఇది రంగు రంగు కాంతులు విరజిమ్ముతూ నయనానందం కలిగిస్తుంటుంది. కావాలంటే ఈ వీడియో మీరే చూడండి.

మిగిలిన ఫోటోలు తర్వాతి టపాలో. ఇంతకీ ఐస్ హోటల్ ఎలా ఉందంటారు?

సాఫ్ట్ వెటకారాలు

2009-01-25T06:15:00.001-08:00

ఈ మధ్య సాఫ్ట్వేర్ ఉద్యోగుల మీద వస్తున్న వెటకారాలు, వార్తలకు నా ప్రతిస్పందన ఇది. సాటివారు బాధల్లో ఉన్నారని కూడా చూడకుండా ఈ మధ్య వార్తా పత్రికల్లో వస్తున్న వెటకారపు ఆర్టికల్స్, దానికి కొన్ని బ్లాగుల్లో కొనసాగింపు చేస్తున్న విధానం చూస్తే బాధ కలుగుతుంది. సాటివారు తమ జీవన భృతి గురించి ఆందోళన పడుతుంటే వీరికందులో ఎడతెగని హాస్యం కనపడుతోంది.

ఇక సత్యం ఉదంతం బయటపడ్డప్పటినుంచీ మన పత్రికలు సత్యం మూసివేయటం ఖాయమని, ఉద్యోగులు చేత చిప్ప తప్పదని ఊదరగొట్టేస్తున్నాయి. సత్యం రాజు మోసం చేసినట్లు చెప్పబడుతున్న 7000 కోట్లు ఆయనొక్కడే సంపాదించింది కాదు. అది ఆ సంస్థలోని ఉద్యోగుల సంపాదన కూడా. అంత సంపద సృష్టించగలిగినవారు తమ భార్యా పిల్లలను పోషించుకోలేరా? అయినా సత్యం సంస్థ పోగొట్టుకున్నది సంపాదించిన డబ్బునే కానీ, సంపాదించే చేతులను కాదు. ఇప్పటీకీ ఆ సంస్థ ఉనికిలోనే ఉన్నది. ఆ ఉద్యోగులు ఇంకా సంపదను సృష్టిస్తూనే ఉన్నారు. అయినా కూడా వార్తా పత్రికలు ఇక ఉద్యోగుల పని అయిపోయిందనే అంటున్నాయి. సాధారణంగా ఇంట్లో దొంగలుపడి మొత్తం దోచుకుపోతే ఇంటివారు మరోసారి అలా జరగకుండా పకడ్బందీ ఏర్పాట్లు చేసుకుంటారేగానీ ఆ ఇంటిని కూలగొట్టేసి, రోడ్డున పడి అడుక్కుతినరు. వీరి బాధ అలా ఇంకా జరగలేదనా? ఆ సంస్థ ఉద్యోగుల, మదుపుదారుల మానసిక స్థైర్యాన్ని, శాంతిని పెంపొందించే విధంగా నాలుగు మాటలు చెప్పటం మంచిదికాదా?

ఆర్థిక మాంద్యంవల్ల అన్ని రంగాల్లో అభివృద్ధి కుంటుపడినా కేవలం సాఫ్ట్వేర్ రంగం మాత్రమే మునిగిపోయినట్లు వార్తాపత్రికలు కోలాహలం సృష్టిస్తున్నాయి. ఇవి కొందరికి శునకానందం కలిగిస్తోందనుకుంటాను. సాఫ్ట్వేర్ ఇంజనీరంటే కేవలం 3 నెలల కోర్సు చేసి వేల జీతం వచ్చే ఉద్యోగాన్ని అప్పనంగా కొట్టేస్తారనుకుంటారు. ఉద్యోగం తేలిగ్గానే దొరికినా దాన్ని నిలబెట్టుకోవటానికి అహర్నిశలు పాటు పడాల్సి ఉంటుంది. అనునిత్యం కొత్త కొత్త కోర్సులు చేయాలి. లేకపోతే 6 నెలల్లో నేర్చుకున్నది పనికి రాకుండా పోతుంది. ఇక జీతం సంగతి వస్తే, తీసుకున్నదానికంటే ఎక్కువే కష్టపడాల్సి ఉంటుంది. సహనం, ఏకాగ్రత కోల్పోకుండా గంటల తరబడి పని చేయాల్సి ఉంటుంది. ఇలా తమని తాము మలుచుకోలేనివారు ఈ రంగంలో చాలా త్వరగా తమ ఉద్యోగాలు కోల్పోతారు. ఈ రంగంలో ఉద్యోగాలు ఊడటం ఎంత సులభమో కొత్త ఉద్యోగాలు పుట్టుకురావటం కూడా అంతే సులభం. ఉన్న ఉద్యోగం ఎన్నాళ్ళుంటుందో తెలియని పరిస్థితి ఈ రంగంలో మామూలే కాబట్టి ఉద్యోగులు కూడా సహజంగానే ఇలాంటి విపత్కర పరిస్థితులకు సిద్ధపడే ఉంటారు. కాబట్టి వారు తమ పరిస్థిని చక్కదిద్దుకునేదాక మన అనవసర భయాలను వారి మీద, వారి కుటుంబసభ్యుల మీద రుద్దకుండా ఉంటే అదే వారికి మనం చేయగలిగే పెద్ద ఉపకారం.

వీలైనంత త్వరగా కష్టకాలం గడిచి అందరికీ మంచి రోజులు రావాలని ఆశిస్తూ సెలవు తీసుకుంటున్నాను.

(నేను సాఫ్ట్వేర్ ఉద్యోగి కాదు. కానీ నా స్నేహితుల్లో చాలా మంది ఈ రంగంలో పనిచేస్తున్నారు. వారిని చూసిన తర్వాత ఇలా వ్రాయాలనిపించింది.)

అన్నం పెట్టే అద్దె ఇల్లు

2009-01-24T05:19:00.001-08:00

మేము అద్దె ఇల్లు వెదికేటప్పుడు జరిగిన సరదా సంఘటన. మా మేనేజరు-క్లయింట్ల సర్దుబాట్ల వల్ల ప్రతి సంవత్సరం కొత్త చోట్ల పని చేయవలసి ఉంటుంది. అందువల్ల అద్దె ఇల్లు వెతుక్కోవటం అన్న ప్రహసనం క్రమం తప్పకుండా ఉండేది. మేముండే క్వీబెక్ రాష్ట్రమంతా ఫ్రెంచి బాషాధిపత్యం. నేనేమో ఓ మూడు ముక్కల ఫ్రెంచితో జీవిత లాంచి నడుపుకునేవాణ్ణి. సరే, ఒక శుభదినాన ఇల్లు వెదుకుదామని నిశ్చయించుకుని, ఉండడానికి మంచి ప్రదేశమేదో మా ఆఫీసులో కనుక్కుని అక్కడ వెళ్ళాము. నా ఫ్రెంచి అర్థం చేసుకున్న పండితులు లోనికి రానిచ్చి ఇల్లు చూపించారు, అర్థంకాని అఙ్ఞానులు ఫోన్ నంబర్లు ఇచ్చి ఇంగ్లీషు వచ్చినవారితో తర్వాత మాట్లాడుకొమ్మన్నారు.

మరుసటి రోజు ఫోన్లు కొట్టడం ప్రారంభించాను. కొందరు అపాయింట్మెంట్లిచ్చారు. అలా సాఫీగా సాగిపోతున్న సమయాన... ఒక ఫోన్ సంభాషణ

నేను: బోజూ (ఫ్రెంచి నమస్కారం), నేను మీ ప్రకటన చూసి ఫోన్ చేస్తున్నా. మీ వద్ద అద్దె ఇళ్ళేవైనా....

అద్దెఇంటతను: ఓ తప్పకుండా. మీకే సైజు ఇల్లు కావాలి?

నేను: 3 1/2 (ఒకే పడకగది ఉన్న ఇంటిని ఇలా సూచిస్తారు.)

అద్దెఇంటతను: ఉన్నాయి. ఇల్లు చూడ్డానికి ఎప్పుడు వస్తున్నారు?

నేను: అద్దెంతో చెపితే...

అద్దెఇంటతను: 800-900 డాలర్లు.

అద్దె చాలా ఎక్కువ చెపుతున్నాడనిపించి ఎయే సౌకర్యాలు ఇస్తున్నారని అడిగాను. ఇక్కడ కొన్ని లేదా పూర్తి ఇంటి సామాన్లతో కూడా ఇళ్ళు దొరుకుతాయి. కరెంటు, ఇంటిని వేడి చేసే ఖర్చులు కూడా అద్దెలోనే కలిపే అవకాశముంది.

అద్దెఇంటతను: స్టవ్వు, ఫ్రిడ్జు, కరెంటు, house heatingతో పాటు తక్షణ అవసరాలకు ఒక అంబులెన్సుతో పాటు రోజూ మూడు పూట్ల భోజనం.

ఒక్క క్షణం అతనేం చెపుతున్నాడో అర్థం కాలేదు. ఏంటీ, ఇల్లు అద్దెకు తీసుకుంటే మూడు పూట్ల భోజనం కూడానా. మరి మధ్యాహ్నం ఆఫీసులో ఉంటానే, భోజనం మిస్సయిపోతానే, అయ్యయ్యో అనుకుంటూ...

నేను: రోజూ భోజనం పెడతారా??

అద్దెఇంటతను: అవునండి. కానీ శని, ఆదివారాలు మాత్రం కుదరదు. మీరే బయట భోజనం చేయాలి లేకపోతే ఇంట్లోనే వండుకోవాలి.

ఇలాంటి అద్దె ఇల్లు చేయి తప్పిపోకూడదనుకుంటూ, "మరి నాకు రోజూ మధ్యాహ్నం ఆఫీసు ఉంటుంది కదా? మరి నా మధ్యాహ్నం భోజనం సంగతి ఎలా?" అంటూ నసిగాను.

అద్దెఇంటతను: ఆఫీసా? మీరింకా పని చేస్తున్నారా??

ఎక్కడో ఏదో తేడా జరిగిందని మా ఇద్దరికీ అర్థం అయ్యింది. నేను అద్దె ఇల్లు ఎందుకు వెదుక్కోవలసి వచ్చిందో వివరంగా చెప్పాను. అప్పుడు అతను చెప్పాడు...

నేను ఫోన్ చేసింది వృద్ధాశ్రమానికని.

(ఇది నిజంగా జరిగిన సంఘటన. బిల్డింగ్ ముందున్న ఫ్రెంచి బోర్డు చదవలేక కేవలం ఫోన్ నంబరు మాత్రం వ్రాసుకుని రావటం వల్ల జరిగిని పొరపాటిది. నేను ఆయనకు క్షమాపణలు చెప్పుకుని ఫోన్ పెట్టేసాను. ఆ వృద్ధాశ్రమం ఇప్పుడున్న ఇంటికి దగ్గరే. మేము తర్వాత ఉండబోయేది ఇక్కడే అని నేనూ మా ఆవిడ నవ్వుకుంటుంటాము.)

శిశిరపు రంగులు

2008-12-28T15:25:00.001-08:00

చాలా రోజుల తర్వాత ఇప్పటికి టపా వ్రాయటం కుదిరింది. ఇండియా వెళ్ళిపోవటం దాదాపు ఖాయం అయిన తర్వాత కంపెని అవసరాల కోసం మరో 7-8 నెలల పాటు అక్కడే ఉండమని మా మేనేజరు చెప్పటంతోనూ, పాత ఇంటి లీజు ముగిసినందున మళ్ళీ అద్దె ఇల్లు వెతుక్కోవాల్సి వచ్చింది. గత 3 సంవత్సరాలలో మూడో అద్దె ఇంటిని దిగ్విజయంగా వెతుక్కుని చేరేసరికి తల ప్రాణం తోకకు వచ్చింది.

ఇక్కడ కూడా చెట్లు ఆకులు రంగులు మారి చాలా అందంగా కనిపించాయి. తర్వాత మంచు కురవటం కూడా ప్రారంభం అయ్యింది. కొన్ని ఫోటోలు పంచుకుందామని ఈ టపా.

శిశిరానికి స్వాగతం పలుకుతున్న చెట్లు.

వర్ణరంజితంగా ఉన్న మా పాత ఇంటి వీధి.

మా కొత్త ఇంటి కిటికినుండి కనిపిస్తున్న మంచు వర్షం.

ఇక ఈ మంచు కరిగి మళ్ళీ వేసవి ప్రారంభం అయ్యేవరకు నిరీక్షణ తప్పదు.

నానో కన్నా ముందుగా... నానో కన్నా చౌకగా... ఒరేవా సూపర్

2008-10-14T15:50:00.001-07:00

ఇప్పటి వరకూ టాటావారి నానో కారే చౌకైనది అనుకునేవారికి ఒక వార్త. ఇప్పుడు నానో కారికన్నా చౌకగా, దానికంటే ముందే మార్కెట్లోకి మరో కారు రాబోతోంది. దాని పేరే ఒరేవా సూపర్ (Oreva Super). దీన్ని తయారు చేసింది అజంతా గ్రూప్స్. వీరు ఒక మాడలును తయారు చేసి అప్పుడే రాజ్కోట్ షోరూంలో ప్రదర్శనకు పెట్టారు. దీని వెల దాదాపు 85,000 నుండి 1,00,000 వరకు ఉండొచ్చని వార్త. ఆ వార్తను ఇక్కడ చూడండి. NDTV వారి వీడియో ఇక్కడ చూడవచ్చు.

అడవి కాచిన ఆపిల్స్

2008-10-05T16:14:00.001-07:00

మా ఇంటికి దగ్గర ఉన్న ఒక ఆపిల్ చెట్టు ఫోటో ఇది. ఈ సంవత్సరం ఆపిల్ పికింగ్ కు వెళ్ళటం కుదర్లేదు. ఆందుకని ఇలా సరిపెట్టామన్నమాట.

తోటల్లో అయితే గుత్తులు గుత్తులుగా ఉంటాయి.

Marine Land చూద్దాం రండి

2008-09-19T16:28:00.001-07:00

మెరిన్ ల్యాండ్ అనబడే ఈ విహార స్థలి నయాగరా జలపాతానికి దగ్గరలోనే ఉన్నది. నయాగరా చూసిన తర్వాత తప్పకుండా చూసి ఆనందించాల్సిన ప్రదేశమిది. పిల్లలకు పెద్దలకు వినోదాన్ని పంచటానికి బోలెడన్ని రైడ్స్, డాల్ఫిన్ల ప్రదర్శన, వివిద రకాలైన తిమింగలాలను ఇక్కడ చూడవచ్చు. మరిన్ని వివరాలకి వికిపీడియా పుటను ఇక్కడ చూడండి.

అక్కడ తీసిన కొన్ని ఫోటోలు మీతో పంచుకుంటున్నాను.

ఇక్కడ తిమింగలాల ప్రదర్శన జరుగుతుంది. శిక్షకులు వచ్చి నిర్ణీత సమయాలలో ప్రదర్శన ఇప్పిస్తారు.

ఈ ప్రదర్శనలో తిమింగలం తన తోకతో నీటిని బాదుతూ చుట్టూ ఉన్న జనం నీళ్ళతో తడిచిపోయేలా చేస్తుంది. నీటీ నుంచి పైకెగిరి గిరికీలు కొట్టడం మరో అంశం. జనంపై నీళ్ళు పడేలా తోకతో నీటిని కొడుతున్న దృశ్యం పై ఫోటోలో చూడవచ్చు.

ప్రదర్శన తర్వాత తీరిగ్గా తిరుగుతూ(ఈదుతూ) సేద తీరుతున్న నేస్తం.

ఇక్కడి కొలనుల ప్రత్యేకత ఏమిటంటే ఇవి రెండు అంతస్తులుగా విభజించబడి ఉంటాయి. పైన మనకు సాధారణ కొలనులాగ కనిపిస్తుంది. అక్కడే ప్రదర్శనలు జరుగుతాయి. ఇక దిగువ అంతస్తు గాజుతో నిర్మించబడి లోపలినుండి జలచరాలను గమనించడానికి అనువుగా ఉంటాయి.

ఇది తెల్ల తిమింగలం (Beluga Whale). వీటితో ఏ ప్రదర్శనలు చేయించ లేదు. కానీ చూడటానికి విచిత్రంగా కనిపించాయి.

ఇది మెరిన్ ల్యాండ్ రైడ్లలో ముఖ్య ఆకర్షణ. దీన్ని స్కై స్క్రీమర్ అని పిలుస్తారు. ఇది ఎక్కి పైవరకు వెళితే నయాగరా జలపాతం మొత్తం కనిపిస్తుందట. మేము దీన్ని ఎక్కేంత సమయం లేకపోవటంతో ముందుకు సాగాము. ఇది ఎక్కాలంటే ముందు ఇది ఉన్న చిన్న కొండలాంటిదాన్ని ఎక్కాలి మరి. ఇదే కాకుండా ఇంకా చాలా రైడ్స ఉన్నాయి. చిన్న పిల్లలకు కూడా చాలా రైడ్స్ ఉన్నాయి.

కేవలం జలచరాలే కాకుండా ఎలుగుబంట్లు, జింకలు కూడా ఉన్నాయి. జింకలను మనం ముట్టుకుని, వాటిని నిమిరి, మేత పెట్టేందుకు కూడా వీలుంది.

ఇదే మెరిన్ ల్యాండ్కే ప్రధాన ఆకర్షణ. కింగ్ వడార్ఫ్ స్టేడియం. డాల్ఫిన్ల ప్రదర్శనా స్థలం. కేవలం డాల్ఫిన్లే కాకుండా సీల్స్, వాల్రస్లు కూడా ప్రదర్శనలో పాలు పంచుకుంటాయి.

ఇక ఈ షోకి సంబంధించిన వీడియోలు చూసే ముందు చిన్న మాట. కొన్ని వీడియోల నిడివి ఎక్కువగా ఉండటం వల్ల లోడు కావటంలో ఇబ్బందులు కలగవచ్చు. అందుకు ముందస్తు క్షమాపణలు.

ప్రేక్షకులలోనుండి ఒక పాప/బాబును పిలిచి ఆ పాప చేత డాల్ఫిన్ కు సూచనలు ఇప్పించి దాని చేత కొన్ని అంశాలను ప్రదర్శింపజేస్తారు. చివరగా ఒక డాల్ఫిన్ బూరను ఇచ్చి పంపుతారు.

తోకలూపుతూ బై బై చెపుతున్న డాల్ఫిన్లు.

వాల్రస్ ప్రదర్శన కూడా చూడండి మరి.

మధ్యాహ్నం వరకు అంతా తిరిగి చూసి సాయంత్రానికి మా ఊరికి తిరుగు ప్రయాణం కట్టాము.

మరోసారి నయాగరా దర్శనం

2008-09-06T16:59:00.001-07:00

గతవారం 3 రోజులు శెలవులు కలసి రావటం వల్లా, ఇక ఈ నెల్లోనే ఇండియా తిరిగి వెళ్ళే అవకాశం (మా మేనేజరు దయ, మా ప్రాప్తం) ఉండటం వల్లనూ ముచ్చటగా మూడోసారి నయాగరా విహార యాత్ర కుదిరింది. అక్కడి కొన్ని ఫోటోలు, వీడియోలు మీతో పంచుకుందామని ఇక్కడ ఉంచుతున్నాను. ఇంతకు మునుపు తీసిన నయాగరా ఫోటోలు నా పాత టపాల్లో ఉన్నాయి, ఆసక్తి ఉన్నవారు పాత పుటలు తిరిగేయగలరు.

ఇది గుర్రపునాడాగా పిలువబడే జలపాతపు పాయ. ఇది కెనడా దేశపు భూభాగంలో ఉన్నది. జలపాతం దగ్గరకు బోటుల్లో వెళ్ళే సదుపాయం వేసవికాలంలో ఉంటుంది.

ఇది అమెరికా దేశపు భూభాగంలో ఉన్న పాయ. అమెరికావాళ్ళు జలపాతానికి పక్కనుండి కిందకు దిగుతూ చూసే వీలున్నది.

బోటులో అమెరికా వైపున్న జలపాతాన్ని ఫోటో తీశాను. సూర్యుడు జలపాతానికి ఎదురుగా ఉన్నప్పుడు జలపాతం నుండి ఎగిసిన నీటి తుంపరలలో అందమైన ఇందధనుస్సు ఏర్పడుతుంది.

జలపాతాన్ని దగ్గరగా చూసి ఆనందిస్తున్న అమెరికా ప్రజలు.

కెనడా దేశం వైపున్న జలపాతం. బోటు జలపాతానికి చాలా దగ్గరగా వెళుతుంది. దాదాపు జలపాతం మనమీదే దుముకుతున్నాదా? అనిపిస్తుంది.

జలపాతపు నీటి తుంపరలు వర్షం పడినట్లు పడతాయి. అందువల్ల అందరికీ ప్లాస్టిక్ raincoats ఇస్తారు. జలపాతాన్ని దగ్గరగా చూసి ఆనందిస్తున్న మా సహ ప్రయాణీకులు.

గుర్రపు నాడా ఆకారంలో ఉన్న అగాధంలో దుముకుతున్న జలధార.

రాత్రి రంగురంగుల విద్యుద్దీపాల కాంతిలో మెరిసిపోతున్న నయాగరా. రంగులు మారుస్తుంటారు. చూడటానికి చాలా బాగుంటుంది. కానీ తక్కువ కాంతిలో ఫోటోలు తీయటం నాకు రాదు.

జలపాతానికి దగ్గరలో ఉన్న స్కైలాన్ టవరునుండి నయాగరా జలపాతపు హొయలు.

ఇక నయాగరా జలపాతానికి దగ్గర ఉన్న Marine land ఫోటోలు, వీడియోలు నా మరుసటి టపాలో...

కెన్యా పాడిన జనగణమన

2008-08-23T15:41:00.001-07:00

కెన్యా ప్రజలు మన జాతీయ గీతం పాడిన వీడియో ఇది. పొద్దుపోక అంతర్జాలాన్ని గాలిస్తుంటే ఈ వీడియో కనిపించింది. మీతో పంచుకుందామని ఇలా...

కెనడా రాజధాని టోరోంటో???

2008-08-02T05:58:00.001-07:00

కెనడా దేశపు రాజదాని టోరోంటో అని ఈ రోజు ఈనాడు వెబ్ సైటు చూసినప్పుడే తెలిసింది. వార్త ఇక్కడ చదవండి.

వార్తకు లంకె ఇక్కడ ఇస్తున్నాను. ఒక ప్రముఖ వార్తాపత్రికలో ఇలాంటి తప్పు దొర్లటం ఆశ్చర్యం కలిగించింది.

బెంగళూరు పేలుళ్ళు

2008-07-26T05:17:00.001-07:00

బెంగళూరు నగరంలో నిన్న జరిగిన పేలుళ్ళు ఇద్దరిని బలి తీసుకున్నాయి. ఈ ఘాతుకానికి కారణమెవరో తెలియకపోయినా అనుమానాలు మాత్రం సిమి పైన ఉన్నాయి. బాంబులు తక్కువ శక్తివంతమైనవైనా వాటిని ఉపయోగించటంలో ఆధునిక technology వాడబడిందని వార్త. ప్రజలను భయభ్రాంతులను చేయటానికే వీటిని పేల్చారని అనుకుంటున్నారు. బహుశా బవిష్యత్తులో పెద్ద ఎత్తున దాడులకు పాల్పడటానికే ఈ సన్నాహం అయుండవచ్చు. దాడులకు ప్రభుత్వ ప్రతిస్పందన గమనించి తమ భవిష్య పథకాలను పకడ్బందీగా రచించాలన్నది ఉగ్రవాదుల వ్యూహమైయుండవచ్చు. మరి వాటిని అరికట్టేందుకు ప్రభుత్వం చేపట్టిన చర్య, ఐటి సంస్థలకు అధిక భద్రత కల్పిస్తామన్న ప్రకటన. ఐటి సంస్థలు సరే మరి సామాన్య పౌరుల విషయమేమిటి? ఇలాంటి దాడుల్లో ఎక్కువగా బలైయ్యేది వీరే కదా? ఉగ్రవాద కార్యకలాపాలకు పాల్పడే సంస్థలను నిషేధించినంత మాత్రానా సరిపోతుందా? దేశంలో జరిగిన అనేక ఉగ్రవాద దాడులకు కారణమైనవారు బెంగళూరులో తలదాచుకోవటం చాలా సంవత్సరాలుగా జరుగుతున్నది. ఇలాంటివారిపై ఎలాంటి చర్యలు తీసుకుంటున్నారో ప్రభుత్వానికే తెలియాలి. నిషేధిత సంస్థల కార్యకలాపాలపైనా ఆర్థిక వనరులపైనా గట్టి నిఘా ఉంటే ఇలాంటి దాడులని అరికట్టే అవకాశం ఉంటుంది.

ఈ దాడుల్లో ఎక్కువగా ప్రాణనష్టం జరగకపోవటం ఊరటనిచ్చేదే అయినా ఈ ఊరట ఎన్నాళ్ళో? తన దౌర్బల్యానికి అమాయక ప్రజల ప్రాణాలు మూల్యంగా చెల్లించుకుంటున్నామన్న స్పృహ ప్రభుత్వానికి కలగాలని ఆశిస్తున్నాను.

క్వీబెక్ జాతీయ దిన సంబరాలు-2

2008-07-12T10:05:00.001-07:00

ఇంతకు ముందు టపా వ్రాసిన వెంటనే దీన్ని కూడా వ్రాద్దామనుకున్నాను. కాని పనుల వత్తిడి వల్ల ఇప్పటికి కుదిరింది.

క్వీబెక్ సంబరాల్లో భాగంగా ఒక చిన్న నృత్య కార్యక్రమం జరిగింది. ముందు ప్రదర్శకులు ఒక డాన్సు చేసి చూపించారు. తర్వాత వేదిక మీద ఒకావిడ స్టెప్పులు వేసి చూపిస్తుంటే కింద జనాలు ఒక్కొక్కరే దానికి అనుగుణంగా డాన్సు చేయటం మొదలుపెట్టారు. కొద్దిసేపట్లోనే దాదాపు అందరూ కలిసి ఒక్కటిగా నృత్యం చేయటం ముచ్చటగా అనిపించింది. వాటి ఫోటోలు ఇక్కడ పంచుకుంటున్నాను.

వయసుకు ఉత్సాహానికి సంబంధముందంటారా?

కలసి నడవటమే కాదు కలసి నర్తించటమూ ఆనందమే.

మేమూ పాలు పంచుకుంటాము.

చాలామంది మమ్మల్ని కూడా జత కలవమని పిలిచారు. ఈ సారికి సిగ్గుపడి ఊరుకున్నాము కానీ వచ్చే సంవత్సరం ఇక్కడి జనాలకు ’చిరు’ స్టెప్పులు చూపాల్సిందే.

క్వీబెక్ జాతీయ దిన సంబరాలు

2008-06-28T05:46:00.001-07:00

గత మంగళవారం క్వీబెక్ జాతీయ దినం. మా ఊళ్ళో చాలా చోట్ల సోమవారం సాయంత్రమే సంబరాలు జరిగాయి. ఆటలు, పాటలతో పాటు బాణాసంచా ప్రదర్శన కూడా జరిగింది. మామూలుగా అయితే రోడ్డు మీద ఒకరూ కూడా కనబడరుగాని ఈ సంబరాలలో పాల్గొనటానికి వచ్చిన వందల మందిని చూస్తే మన ఊరి తిరునాల ఙ్ఞాపకం వచ్చింది. ఇక ఈ క్వేబెక్ దినమేమిటంటే దానికి పెద్ద కథే ఉంది. ఆసక్తి ఉన్నవారు ఇక్కడ చూడగలరు.

సంబరాలు జరిగింది మా ఇంటి దగ్గరే ఉన్న ఒక కాలేజి మైదానంలో కాబట్టి నిదానంగా భోజనం చేసుకుని బయలుదేరాము. అప్పటికే పాటల కచేరి జరుగుతోంది. ఇక్కడ ఇబ్బందేమిటంటే కూర్చోడానికి కుర్చీలు ఉండవు. అందరూ నిలబడో, కింద కూర్చొనో చూడాలి. లేకపోతే మడత కుర్చీలో తీసుకురావాలి. మేము కూడా ఇలాంటి సందర్భాల కోసమనే అలాంటి కుర్చీలు కొన్నాము. మన సాంస్కృతిక కార్యక్రమాలలాగ సుత్తి కొట్టేవాళ్ళనెవరినీ పిలవలేదు. నాయకులు వేదిక మీద నిషిద్ధం. ఒక ముసలాయన పాటలు పాడుతూ తన బృందంతో గాత్ర కచేరి నడుపుతున్నాడు. వయసు 75 సంవత్సరాలని తర్వాత తెలిసింది. ఆయన ఉత్సాహం చూస్తే అలా అనిపించదు. ఫ్రెంచి పాటలు కాబట్టి పూర్తిగా అర్థం కాలేదు కాని సంగీతం బాగుండటంతో సమయం తెలియలేదు. పక్కనే అంగళ్ళు, చిరుతిండ్ల దుకాణాలు, గోల చేసే పిల్లలు, అచ్చం మన జాతరను తలపించింది. ఇంతలో మా ఆఫీసువాళ్ళు (కెనడావారే) వచ్చి కలిశారు. వారితో లోకాభిరామాయణం ప్రారంభమైంది. ఇక ఇక్కడ బీరు ఇలాంటి సందర్భాలలో తెగ తాగుతారు. నేను తాగను (రాజు మంచి బాలుడు). గత సంవత్సరం జగ్గుల్లో, మగ్గుల్లో తాగేవారు. అలా ఒకడు తన మగ్గు బీరుతో నాకు స్నానం కూడా చేయించాడులెండి. ఈసారి మాత్రం చిన్నచిన్న టిన్లతో సరఫరా చేసారు. బ్రతికిపోయాను. దాదాపు 10.45 బాణాసంచా కాల్చటం ప్రారంభమైంది. నాకు మాత్రం చాలా అద్భుతం అనిపించింది. దాదాపు 11.30 బాణాసంచా కార్యక్రమం పూర్తయి మళ్ళీ పాటలు ప్రారంభించారు. మేము మాత్రం ఇంటికి వచ్చి ముసుగుతన్నాము. ఇక మీకోసం ఫోటోలు, వీడియోలు ఇక్కడ ఉంచుతున్నాను. ఎలా ఉన్నాయో చెప్పండి.

ఇదే స్వాగత ద్వారం.

పాటల కచేరి. ఫోటో బాగా షేకయ్యింది. సారీ.

వేల వేల వెలుగుపూలు.

ఉవ్వెత్తున వెలుగులు చిమ్ముతున్న కారంజి. (ఇది fountainకు కన్నడ పదం. తెలుగులో ఏమంటారో తెలిసినవారు చెప్పగలరు).

మా ఊరి రైతు బజారు

2008-06-22T05:13:00.001-07:00

ప్రతి శనివారం మా ఊరి బస్టాండ్ దగ్గర ఉన్న రైతు బజారుకెళ్ళి కూరగాయలు, బ్రెడ్లు, పళ్ళు తెచ్చుకోవటం మా అలవాటు. ఇండియాలోలాగానే ఇక్కడ కూడా బేరాలాడుతూ, తెలిసిన రైతులను పలకరిస్తూ, వారు తెచ్చే కొత్త కొత్త బెర్రీలను రుచి చూస్తూ మార్కెట్ అంతా కలయతిరగటం బాగుంటుంది. ఇక్కడ ఇంకొక విషయమేమిటంటే చాలామంది ఆకుకూరలు, కూరగాయల మొక్కలను కొనుక్కుని వాటిని ఇంట్లో పెంచుతారు. వారికి అవసరం వచ్చాక వాటిని వాడుకుంటారు. ఇలాంటి వారి కోసం కూరగాయ మొక్కలు, పూల మొక్కలు కూడా ఇక్కడ అమ్ముతారు. ఇక maple syrup దొరికితే సంతోషమే సంతోషం.

ఇక ఇక్కడ ఉన్న ఇబ్బందల్లా మాకు ఫ్రెంచ్ బాష రాకపోవటం. అయినా వదలకుండా ఫ్రెంచి పదాలు, అంకెలు నేర్చేసుకుని, వేళ్ళు చూపిస్తూ ధరలను బేరమాడేస్తుంటాము. అంతా కొన్న తర్వాత దగ్గరలోని పార్కులో కాసేపు సేదతీరి ఇంటికి బయలుదేరుతాము.

మార్కెట్ ఇంటికి 2 కి.మి. దూరంలోనే ఉండటంవల్లా, వేసవి కావటంవల్ల నడుచుకుంటూ వెళ్తాము. ఆ దారంతా బెర్రీ మొక్కలు, ఆపిల్ చెట్లతో నిండి ఉంటుంది. ఆ దారిలో సైకిళ్ళు తప్ప మరే వాహనాన్ని అనుమతించరు. కాబట్టి ఆ దారి నిశబ్దంగా, ప్రశాంతంగా ఉంటుంది. ఆ నడక దారిలో బెర్రీ మొక్కలనుండి బెర్రీలను కొద్దిమంది సేకరిస్తుంటారు. మేము వారితో కలసి కొన్ని బెర్రీలను సేకరించి వాటిని తింటూ ఇంటికి చేరేసరికి మధ్యాహ్నం దాటిపోతుంది.

ఇదే పని ఇండియాలో అయితే కంగారు కంగారుగా స్కూటరు మీద వెళ్ళి ఒక గంటలో కూరగాయలు కొనేసుకుని, గభాలున ఇంటికొచ్చేసి, టి.వి లకు అతుక్కుపోవటం చేస్తుంటాను. ఈ సారి అక్కడ వచ్చినప్పుడు నా పద్డతులు మార్చుకోవాలి.

ఇదే మా ఊరి రైతు బజారు.

కూరగాయల కోసం వచ్చినవారితో సందడిగా ఉన్న మార్కెట్. బారులు తీరిన కారులు, వ్యానులు.

అమ్మకానికున్న పూల మొక్కలు. సగం సంవత్సరం మంచుతో కప్పబడి ఉండే ఈ దేశంలో తోటపని మీద వీళ్ళకున్న శ్రద్ఢ చూస్తే నాకు అబ్బురమనిపిస్తుంది.

పళ్ళు తినటం ఇక్కడ అలవాటైన ఒక ఆరోగ్యకర అలవాటు.

మా ఊరి జండా ఉన్న గోపురం. ఊరికి జండా ఏమిటని ఆశ్చర్యపడకండి. ఇక్కడంతే. మంగళవారం క్వీబెక్ జాతీయ దినం కోసం ఈ గోపురాన్ని, దాని వెనుక ఉన్న మైదానాన్ని ముస్తాబు చేస్తున్నారు. సోమవారం రాత్రి బాణాసంచా, ఆటలు, పాటలు, బీరు... అబ్బో చెప్పలేనంత సందడి. గత సంవత్సరం నాకు బీరు స్నానం కూడా అయింది. ఈ సారి ఎలా ఉంటుందో తర్వాత చెప్తానే.

మెక్ డోనల్డ్స్ వారి ఇండియన్ వంటకాలు

2008-06-07T04:47:00.001-07:00

Mc Donalds. Pizza hut లాంటి అంతర్జాతీయ fast food సంస్థలు ఇప్పటిదాక భారతీయులకు పిజ్జాలు, బర్గర్లు తినిపించాయి. ఇక భారతీయ వంటలను పిజ్జాల, బర్గర్ల రూపంలో మార్చేసి, పాశ్చాత్యదేశాలకు అందించబోతున్నారని వార్త.

మెక్ డోనాల్డ్స్ వారు Mc puff మరియు ఆలూ టిక్కా బర్గర్లు చేస్తుంటే పిజ్జా హట్ మరియు papa john's వారు టండూరి చికెన్ పిజ్జా అట. ఇవే కాకుండా ఇంకా చాలా వెరైటిలు రాబోతున్నాయట. భలే... భలే. అమ్మకాలు, లాభాలు కూడా బ్రహ్మాండంగా ఉన్నాయట.

ఏది ఏమైనా ఇడ్లీలు, వడలు, దోశెలు లాంటివి కూడా రూపు మారినా కనీసం రుచి మారకుండా వచ్చేస్తే నాలాంటి వారి నోటి కరువు తీరిపోతుంది.

ఇంతా చేసి సమోసాలను మరిచిపోయారేంటి చెప్మా? సరే నెమ్మదిగా అవి కూడా ఉప్మా పెసరట్టుతో పాటు వస్తాయేమో. ఉందిలే మంచి కాలం ముందు ముందునా.....

నా నడక దారి

2008-05-31T13:49:00.001-07:00

నేను అప్పుడప్పుడు నడక కోసం వెళ్ళే అడివి దారి ఫోటోలివి. ఎలా ఉన్నాయి?

మొన్నటిదాకా మోకాలెత్తు మంచుతో కప్పబడి, ఇప్పుడు వెచ్చటి ఎండలో హాయిగా ఉన్న నడక దారి. ఇలాగే అడివిలో చాలా దూరం వరకు ఉంటుంది. చాలా చీలిక దారులతో గజిబిజిగా ఉంటుంది.

ఇది అడివిలో విరివిగా కనిపించే పూలచెట్టు. ఈ పూలు చాలా సువాసనగా ఉంటాయి. కనీసం ఇలాగైనా నా బరువు అదుపులో వస్తే అంతే చాలు.

సాయంత్రం 9:00 గంటలు

2008-05-24T07:54:00.001-07:00

ఇదేమిటి సాయంత్రం 9 గంటలంటున్నాడు అనుకుంటున్నారా? నిజమేనండి. మా ఊళ్ళో వేసవిలో రోజు నిడివి బాగా పెరుగుతుంది. ఇంకో నెలాగితే సాయంత్రం 10 గంటలు కూడా అవుతుంది మరి. వేసవిలో మాకు ఉదయం 4.30 వెలుతురు రావటం ప్రారంభం అయి రాత్రి 10 దాటితేగాని చీకటి పడదు. అదే చలికాలమైతే ఉదయం 8 దాటితేగాని రాని వెలుగు సాయంత్రం 3.30కే వెళ్ళిపోతుంది. చలికాలంలో ఇంట్లోనే ఉండిపోవల్సి ఉంటుంది. బయట కాలు పెట్టడం ఎంతో అవసరం ఉంటే తప్ప జరగదు. -35 డిగ్రీల చలిలో, జోరుగా గాలి వీస్తుంటే, మోకాళ్ళ లోతు మంచులో నడవటం అనుభవిస్తేగానీ తెలియదు. "ఎముకలు కొరికే చలి", "కొయ్యబారిపోవటం" అంటే ఏమిటో గత 2 సంవత్సరాలలో బాగా అర్థం అయింది. అందుకే వేసవి మాకు చాలా ఆనందాన్నిస్తుంది. ఇక్కడ నాకు బాగా నచ్చిన విషయాలలో మా ఆఫీసు పనివేళలు. ఉదయం 6.30కు ప్రారంభమై సాయంత్రం 3.30 ముగుస్తుంది. ఎవరూ కూడా ఆయాసపడిపోతూ గంటలకొద్ది పనిచేయరు. ముఖ్యంగా ఎంత freshగా వెళ్తామో, అంతే freshగా తిరిగి వస్తాము. అందువల్ల నేను సాయంత్రం 4 గంటలకే ఇంటికి దిగబడిపోయి, కాస్త ఫలాహారాన్ని లాగించి, మా ఇంటి పక్కనే ఉన్న అడివిలో నడకకో, దగ్గరలో ఉన్న నదీ తీరానికో, వీధుల వెంబడి వ్యాహళికి వెళ్ళటం అలవాటయ్యింది. జీవితాన్ని ఇలా కూడా అహ్లాదంగా గడపవచ్చన్న విషయం ఇక్కడ వచ్చాకే అర్థం అయింది. ఒక్కోసారి ఇండియా వెళ్ళాక మళ్ళీ ఆ ఉరుకుల పరుగుల జీవితంలో ఇమడగలనా అని భయమేస్తుంది. ఉందిలే మంచి కాలం ముందు ముందునా.. అని పాడుకోవటం తప్ప ఏం చేయగలం చెప్పండి?

సాయంసంధ్యలో రూపు చెదిరిపోతున్న మేఘం.

ఈ ఫోటోను రాత్రి? 9 సూర్యుడి అస్తమయం తర్వాత తీసాను. ఊరికే బ్లాగులో పోస్టు చేస్తున్నాను.

జైపూరుపై ఉగ్రవాద దాడి

2008-05-18T04:58:00.001-07:00

గత మంగళవారం జైపూరులో ఉగ్రవాదులు పేల్చిన వరుస బాంబులవల్ల 75 మందికిపైగా చనిపోయారు. మామూలుగానే మన నాయకులు ఆ దాడిని ఖండించేసి చేతులు దులుపుకున్నారు. దాడి జరిగిన ప్రదేశంలోని దేవాలయంలో కూడా మరుసటి రోజున పూజలు యధావిధిగా జరిగాయి. ఇక ఇదే నగరంలో ఈ రోజు క్రికెట్ మ్యాచు జరుగుతోంది. దాడి జరిగిన ఆనవాలు మరో మంగళవారానికి మచ్చుకైనా కానరావు. మరో దాడి జరిగేవరకు హాయిగా నిదురపోవచ్చు.

దాడి చేసినది ఒక పొరుగుదేశపు ఉగ్రవాద సంస్థ అయితే దానికి తోడ్పడింది మరో పొరుగుదేశపు గూఢాచారి సంస్థ అని అనుమానం. మన పొరుగుదేశాలు తమ భూభాగంపై అనేక ఉగ్రవాద సంస్థలు శిక్షణా శిబిరాలు నడుపుతుంటే వాటిని అరికట్టకుండా వాటికి పరోక్ష మద్దతిస్తున్నాయి. ఏ దేశమైనా తన ప్రజల ప్రాణాలను పణంగా పెట్టి పొరుగుదేశాలతో శాంతిని కోరదు. దేశంలో జరిగిన, జరుగుతున్న దాడులకు పొరుగుదేశపు ఉగ్రవాద సంస్థలే కారణమని తెలిసినా సదరు పొరుగుదేశంతో శాంతి, వ్యాపార చర్చలకు సిద్ధమయ్యే ప్రభుత్వాలకు ఇదెప్పుడు అర్థమవుతుందో? మూర్ఖ మిత్రుడు వివేకవంతుడైన శత్రువు కన్నా ఎక్కువ చెరుపు చేస్తాడు. కాబట్టి, ఇకనైనా ఆ మూర్ఖ మిత్రత్వం కోసం ప్రయత్నం మానుకుని, ప్రజల ప్రాణ రక్షణపై దృష్టి పెట్టవలసిందిగా ప్రభుత్వానికి నా మనవి.

తిండిపోతు మధ్యతరగతి భారతం

2008-05-04T11:51:00.001-07:00

నిన్నబుష్షయ్యగారు చేసిన వ్యాఖ్య బాధనిపించి ఈ టపా వ్రాస్తున్నాను. ప్రపంచ ఆహార సమస్యకు భారతదేశపు మధ్య తరగతి ప్రజలు ఎక్కువగా తినటమే అని బుష్ గారు శెలవిచ్చారు. ఎవరికెలా అనిపించినా నాకు మాత్రం అధ్యక్ష ఎన్నికకు పన్నిన కుతంత్రం అనిపించింది.

అమేరికా డాలరు విలువ పడిపోవటం వల్ల ఆ దేశ సగటు పౌరుడి కొనుగోలు శక్తి తగ్గింది. మరో వైపు భారత్, చైనాలాంటి దేశప్రజలు కొనుగోలు శక్తిలో అమేరికా ప్రజలతో పోటీ పడుతున్నారు. అందువల్ల అమెరికా ప్రజ కొద్దిగా ఆర్థిక ఇబ్బందులకు లోనవుతోంది. దీంతో అమేరికా అధ్యక్ష ఎన్నికలలో ఆర్థిక పరిస్థితే కీలకమవబోతున్నది. ఇక అక్కడి ప్రభుత్వాలు ఇలాంటి సమస్యలకు బయట వేరెవరో కారణమని ప్రజలను నమ్మించటం అలవాటు చేసుకున్నాయి. ఆ ప్రయత్నంలో భాగమే ఈ వ్యాఖ్యలు. సంప్రదాయక వోట్లను పునాదిగా చేసుకున్న పార్టీకి చెందిన బుష్షయ్య మరెలా మాట్లాడతారనుకోగలం? అసలు ’భారతదేశపు మధ్యతరగతి ప్రజల సంఖ్య అమెరికా జనాభాకంటే ఎక్కువ’ అనటమే తమకు చెందాల్సిన ఆహారాన్ని వేరెవరో స్వంతం చేసుకున్నారన్న దురభిప్రాయాన్ని ప్రజలకు కలిగించటం కాదా? కొంపదీసి వారి ఆహారాన్ని మేము తిన్నామని రేపు దాడి చేయరు కదా? అసలు వారి అంతర్గత వైఫల్యాలకు వేరే దేశాలను బాధ్యులను చేసి దాడి చేయటమే వారి విదేశాంగ విధానం కదా.

వసంతాగమనం

2008-04-27T14:08:00.001-07:00

చూస్తూండగానే వసంతం వచ్చింది. అసలెప్పటికైనా కరుగుతాయా అనిపించేలా ఉన్నా మంచు కొండలను ఆనవాలు లేకుండా చేస్తూ, తెల్లటి మంచు పూలతో విరబూసి ఉన్న చెట్లకు రంగు రంగుల పూలను పూయించేందుకు వసంతం తరలి వచ్చింది. బద్ధకంగా ముడుచుకుని ఉన్న ప్రకృతి గోరు వెచ్చని ఎండకు ఒళ్ళు విరుచుకుని పచ్చని చిగుళ్ళతో వసంతానికి స్వాగతం పలకడానికి సిద్ధం అయింది. నల్లటి చలికోటులను వదిలి రంగు రంగుల సీతాకోక చిలుకల్లాంటి పిల్లలు బయట ఆడుకోవటానికి పరుగులు పెడుతున్నారు. స్థబ్దుగా ఉండే వీధులు జనసంచారంతో కళకళలాడుతున్నాయి. మా ఊరిలో నవ చైతన్యం తొణికిసలాడుతోంది. ఆ నవవసంతాగమనాన్ని మీతో ఇలా పంచుకుంటున్నాను.

మంచంతా కరిగిపోగా సువిశాలంగా కనపడుతున్న మా వీధి.

మా ఇంటి ముందున్న అడివి పల్చగా రంగులను అద్దుకుంటోంది. అన్నట్లు అందులో బోలెడన్ని ఆపిల్ చెట్లు ఉన్నాయి. ఈ వేసవికి ఆపిల్ ఊరగాయ పెట్టాలి. ఏమంటారు?

బెంగళూరులో పిల్లలకు ఉచిత చికిత్స

2008-04-20T04:31:00.001-07:00

బెంగళూరులోని శ్రీ సత్యసాయి ఆస్పత్రివారు పిల్లలకు ఉచితంగా గుండెకు సంబంధించిన ఆపరేషన్లు చేస్తున్నారని తెలిసింది. ఆ ప్రకటన ఇక్కడ ఇస్తున్నాను. మీకు తెలిసినవారికి forward చేయగలరు.

Amway నిజానిజాలు

2008-04-13T05:31:00.001-07:00

మనకు తెలిసి మన బంధువులో, స్నేహితులో, ఇరుగు పొరుగులో చాలామంది Amway సంస్థ సభ్యులై ఉండవచ్చు. దీంట్లో చేరే చాలామంది తాము ఈ వ్యాపారం ద్వారా కోట్లు, లేదా లక్షలు సంపాదిస్తామని గాఢంగా విశ్వసిస్తుంటారు. కాని ఇదే వ్యాపారంలో సంవత్సరాల తరబడి కష్టపడి, ఉన్నత అంచెలను చేరిన ఒకాయన తన చేదు అనుభవాలను ఒక పుస్తక రూపంలో ప్రచురించారు. దాన్ని మీకు పరిచయం చేయటమే ఈ టపా ఉద్దేశం.

Merchants of Deception అనే ఈ పుస్తకాన్ని ఆమ్వే పేరిట జరుగుతున్న వ్యాపారాన్ని దాదాపు 10 సంవత్సరాల పాటు నిర్వహించి, అందులో ఉన్నత అంచెలను చేరి, అందులోని మోసాలను పరిశీలించిన Eric Scheibeler అనే ఆయన వ్రాసారు.

Eric ఉద్దేశం ప్రకారం ఈ వ్యాపారంలో నికరంగా సంపాదించేదేమీ ఉండదు. కేవలం ఎండమావులను తరుముతూ, అలసిపోతూ చివరకు ఉన్నదంతా పోగొట్టుకోవటం ఈ వ్యాపారంలో చాలా సాధారణం. కాని ఈ నిజాన్ని తెలుసుకోనీయకుండా చాలా పకడ్బందిగా వీరి శిక్షణ ఉంటుందని ఈ పుస్తకంలో వివరిస్తారు. ఈ వ్యాపారంలో చాలా మంది లక్షలకు లక్షలు సంపాదించినట్లు ప్రచారం చేస్తారు. కాని, నిజంగా ఆ లక్షాధికారుల సంపాదనలో కేవలం Amway వ్యాపారం ద్వారా సంపాదించింది 5 శాతం దాటదని ఎరిక్ చెప్తారు.

ఈ పుస్తకాన్ని ఆయన pdf రూపంలో ఉంచారు. http://www.merchantsofdeception.com/ పుస్తకం చదవదలచినవారు ఇక్కడ మీ email ID ఇస్తే మీకు పుస్తకం download చేసుకోవటానికి ఒక link పంపబడుతుంది.

మనకు తెలిసినవాళ్ళల్లో చాలా మంది ఈ Amway సభ్యులుగా ఉండవచ్చు. మనం వారిని వస్తువులు అంటగట్టే అమ్మకందార్లుగా భావించి ఆట పట్టించటమో, తప్పుకు తిరగటమో చేస్తుంటాము. అలాంటి వారు మీకు తారసపడితే వారికి ఈ పుస్తకం గురించి చెప్పండి. నిజంగానే ఈ వ్యాపారంలో ఉన్నవారందరూ లక్షలు సంపాదిస్తుంటే సంతోషమే. అలాకాక నష్టపోతూ కూడా ఆ నిజాన్ని తెలుసుకోలేక ఇంకా ఇందులో పెట్టుబడి పెడుతుండేవారి కోసమే ఈ పుస్తకం. మనకు తెలిసినవారెవరైనా ఈ సంస్థ సభ్యులుగా ఉంటే, వారికి ఈ పుస్తకం గురించి చెబుదాము. నిజానిజాలను వారే తెలుసుకుంటారు. ఏమంటారు?

సర్వధారి ఉగాది శుభాకాంక్షలు

2008-04-06T10:05:00.001-07:00

నా చిన్నప్పుడు మా అవ్వగారింటికి ప్రతి సంవత్సరం వేసవి శెలువులకు వెళ్ళేవాళ్ళం. అప్పుడు ఒకరోజు నేను స్కూల్లో కొత్తగా నేర్చుకున్న science పాండిత్యాన్ని మా అవ్వగారికి చూపించాలని ’అవ్వా, సూర్యోదయం, సూర్యాస్తమయం ఎందుకయితాయో తెలుసా?’ అని అడిగాను. అందుకు మా అవ్వ ’భూమి మీద ఉన్న మంచివారిని చూడటానికే సూర్య, చంద్రులు వస్తారు. వర్షాలు కురుస్తాయి, భూమి పండుతుంది. మంచితనం వల్లే అంతా సక్రమంగా నడుస్తుంది.’ అని.

అలాంటి మంచివారు విరివిగా ఈ భూమి మీద పుట్టుకురావాలని, ఉన్నవారందరూ మంచితనాన్ని వ్యాపింపజేయాలని ఆశిస్తూ, అందరికీ సర్వధారి నామ సంవత్సర ఉగాది శుభాకాంక్షలు అందిస్తున్నాను.

ఉద్యోగ ధర్మం

2008-03-24T16:54:00.001-07:00

మొన్న నా మెడికల్ ఇన్సురెన్స్ కార్డ్ చేయించుకుందామని మాంట్రియాల్ వెళ్ళాను. అక్కడ చేరుకునేసరికి మధ్యాహ్నం 2.00 అయింది. సాయంత్రం 4.30కు ఆఫీసు మూసివేసే సమయం. అక్కడ నాలాగ వచ్చినవారితో పెద్ద క్యూ ఏర్పడింది. అంత దూరం వచ్చి వెనుదిరిగి పోవటం ఎందుకని మేమూ ఆ తోక చివర నిల్చున్నాము. లోపల వెళ్ళి మా వంతు వచ్చేసరికి మరో గంట గడిచింది. మేము వెళ్ళి మా పనిని విన్నవించుకున్నాము. అక్కడి ఉద్యోగిని మా పత్రాలను పరిశీలించి తృప్తిపొందిన తర్వాత మాకు ఇన్సురెన్స్ కార్డ్ వస్తుందని కానీ దానికోసం 3 నెలలు ఆగవలసి ఉంటుందని చెప్పి, మేము ప్రస్తుతం మా వైద్యసంబంధ సేవలను ఎలా పొందుతున్నామో తెలుసుకుని, మా కార్డు వచ్చేవరకు ఇక్కడి రాష్ట్రంలో ఏయే సేవలను ఉచితంగా పొందవచ్చో తెలిపింది. మేము ఒక్క ఫారం కూడా నింపలేదు. అమే మా వివరాలను నమోదు చేసుకుని ఫారం ప్రింటు చేసిస్తే సంతకాలు మాత్రం పెట్టాము. ప్రధాన కార్యాలయానికి మా పత్రాలు scan చేసి పంపించేసింది. మా పని పూర్తి కావటానికి పట్టింది కేవలం 20 నిమిషాలే. ఇది ఇక్కడి ప్రభుత్వ కార్యాలయాల పనితీరు. మరి మన దేశపు ప్రభుత్వ కార్యాలయాల పనితీరును ఇక్కడితో పోల్చగలమా? లంచం ఇవ్వకుండా మా ఆవిడ passport కోసం మా పెళ్ళి ధృవపత్రం సంపాదించటానికి బెంగళూరులో వేరే వేరే మూలల్లో ఉన్న 3 కార్యాలయాలకు దాదాపు నెలన్నర పాటు తిరిగగాను. అఫీసులో 5 రూపాయలకు దొరికే అప్లికేషన్ ఫారం "స్టాకు" లేదు కానీ అదే ఆఫీసు బయట మెట్ల ధగ్గర 35 రూపాయలకు దొరుకుతుంది. 100 రూపాయలిస్తే ఒక బ్రోకరు పని చేసిపెడతాడు. కాదూకూడదంటే అడ్డమైన ఫారాలు నింపి, ఎవెరెవరివో సంతకాలు తీసుకుని రావాలి. ఇంజనియరింగు చదివినా ఒక చిన్న ఫారం కూడా నింపలేవా అన్నట్లు ఆ ఉద్యోగి ఓ పదిసార్లు తప్పులు పడతాడు. ప్రతి తప్పుకూ పరమపద సోపానంలో ఆదిశేషుడు మింగిన కాయలా మనం క్యూ చివరకు చేరుతాము. ఇలా 2 సార్లు జరిగేసరికి సదరు ఉద్యోగి పని చేసిన అలుపు తీర్చుకోవటానికి వెళతాడు. మళ్ళీ ఆఫీసు మూసేముందు కనిపిస్తాడు. ఇలా 3 శనివారాలు జరిగిన తర్వాత, ఫారంలో ఏ చిన్న తప్పులూ లేవని నిర్ధరించుకుని వెళ్తే, చివరకు ఒక ఫారం కాగితం వెనుకవైపు తిప్పి, ఆ ఖాళీ ప్రదేశంలో సంతకం చేయలేదని అప్లికేషన్ తీసుకోకుండా నిరాకరించిన ఉద్యోగిని చూస్తే ఎంత అసహ్యం కలిగిందో మాటల్లో చెప్పలేను. చివరకు ధృవపత్రం చేతికి వచ్చేసరికి పుణ్యకాలం కాస్త గడిచిపోయి మా ఆవిడ వెంటలేకుండానే నేను కెనడా వచ్చాను. దీనివల్ల ఎంత డబ్బు, సమయం వృధా అయిందో ఆ ఉద్యోగికి పట్టదు. ఒకవేళ ఫిర్యాదిచ్చినా అది త్వరగా తెమిలే వ్యవహారం కాదు. అయినా ఒక ఉద్యోగి తన విధులను నిర్వర్తించేలా చేయటానికి కూడా ఫిర్యాదు చేయవలసి రావటం మేము చేసుకున్న దురదృష్టం.

మన ప్రభుత్వ కార్యాలయాలలో కూడా ఇలాగే పనులు జరిగే రోజులు వస్తాయా?

Yahoo messenger, Google talkలో తెలుగు వ్రాయటం ఎలా?

2008-03-16T07:16:00.001-07:00

Yahoo messenger, Google talkలలో తెలుగులో వ్రాయాలని నాకు చాలా రోజులనుండి కోరిక. ఈ రోజు ఒక దారి కనిపించింది. దీనికన్నా సులభ పద్ధతి ఉంటే దయచేసి నాకు తెలుపగలరు.

ముందుగా నేను వ్రాయాలనుకున్నదాన్ని కింద చూపిన సైట్లో తెలుగు లిపిలో వచ్చేలా వ్రాసి, దాన్ని messenger లేదా talkలో అతికించి (paste) చేసి పంపితే అది తెలుగులోనే పంపినవారికి చేరుతోంది.

http://www.google.com/transliterate/indic/Telugu

బరహIME ఉన్నవారు ఏ notepadలోనో తెలుగులో వ్రాసి దాన్ని messengerలో అతికించేసి పంపుకోవచ్చు. ప్రస్తుతం ఇది చికాకు పద్ధతే అయినా తెలుగులో మరెలా వ్రాయాలో తెలియకపోవటంవల్ల ఇదే వాడుతున్నాను. విఙ్ఞులు సులభ పద్దతి చూపించవసిందిగా మనవి.

మళ్ళీ మంచు కురిసింది.

2008-03-08T06:15:00.001-08:00

నిన్న రాత్రి కూడా మంచు కురిసింది. ఈ వారానికి ఇది రెండవ మంచు తుఫాను. ఇప్పుడంటే అలవాటు పడిపోయాను కానీ కొత్తగా వచ్చినప్పుడు చలికాలంలో బయటకు వెళ్ళాలంటే T.Vలో వాతావరణ సూచనలు తెలుసుకునిగానీ వెళ్ళేవాళ్ళం కాదు. ఇప్పుడు మంచులోనే వెళ్ళటం, జారిపడటం మామూలైంది. కొత్తల్లో ఎక్కడైనా జారిపడితే మయసభలో దుర్యోధనుడు బాధపడినంతగా బాధ పడిపోయేవాడిని. ఇప్పుడు హాయిగా నవ్వేసి, మంచు దులుపుకుని ముందుకు సాగటమే.

సరేగానీ పొద్దున్నే లేచి ఫోటోలు తీశాను. కొన్ని ఇక్కడ ఉంచుతున్నాను. ఎలా ఉన్నాయో చెప్పండి.

మా బాల్కని నుండి కనిపించే దృశ్యం.

మా ఇంటి ముందున్న అడివి.

మా అపార్ట్ మెంట్. ఒక అంతస్తంత ఎత్తుగా మంచు పేరుకుపోయి ఉంది.

హాయిగా ముసుగు తన్ని పడుకోనీయకుండా కార్లను శుభ్రపరిచే పని నిజంగా శిక్షే.

తెలుగు వికిలో మా ఊరును చేర్చానోచ్....

2008-02-17T05:25:00.001-08:00

చివరకు ఎలాగైతేనేమి మా ఊరు గురించి తెవికిలో ఒక వ్యాసం సృష్టించగలిగాను. దీనికి ప్రేరణ ఈనాడులో వచ్చిన ముఖచిత్ర కథనం అయితే సహాయం వైజాసత్యగారిది. ఎలా వ్రాయాలో తెలియక సహాయం కోసం అడిగితే వైజాసత్యగారు సహాయపడ్డారు. అందుకు వారికి నా కృతఙ్ఞతలు.

మనం మన ఊరి గురించి గర్వంగా చెప్పుకోవాలి. మన ఊరు మన వ్యక్తిత్వంలో ముఖ్య భాగం. అందువల్ల మీరు కూడా మీ ఊరి గురించి మీకు తెలిసింది వ్రాయండి. మీకు అన్ని విధాలుగానూ సహాయం తెవికిలో దొరుకుతుంది. కేవలం బద్ధకంవల్ల మాత్రం మానేయకండి. కాస్త సమయం చేసుకుని మీ ఊరిని ప్రపంచానికి పరిచయం చేయండి.

మా ఊరి వ్యాసానికి ఇక్కడ లంకె ఇస్తున్నాను. ఎవరైనా ఈ వ్యాసానికి మార్పులు చేర్పులు చేయదలిస్తే నిరభ్యంతరంగా చేయవచ్చు లేదా నాకు ఇ-మెయిల్ పంపినా సరే.

http://te.wikipedia.org/wiki/%E0%B0%AA%E0%B0%BE%E0%B0%AE%E0%B0%BF%E0%B0%A1%E0%B0%BF

చిన్ననాటి సంగతులు

2008-02-03T14:43:00.001-08:00

ప్రతివారికీ ఎప్పుడో ఒకప్పుడు తమ ఊరు ఙ్ఞాపకం వస్తుంది. నాకైతే ఈ ఆదివారం ఈనాడు ముఖచిత్ర కథనం చూసి, వికిపిడియాలో మా ఊరి గురించి వివరాలు చూద్దామని వెతికినప్పుడు మా ఊరు ఙ్ఞాపకం వచ్చింది. వికిపిడియాలో అయితే ఖాళీ కాగితం దర్శనమిచ్చింది. ఇక అక్కడ వివరాలు పొందుపరచవలసి ఉంది.

మా ఊరు అనంతపురం జిల్లా పెన్నా నది తీరాన ఉన్న పామిడి గ్రామం. నా చిన్నతనంలో పెన్నా నది చాలా బాగుండేది. విశాలమైన ఇసుక తిన్నెలు మా ఊరి పిల్లలందరికీ ఆట మైదానాలు. వర్షాకాలంలో మాత్రమే నిండుగా ప్రవహించే నది ఎండాకాలంలో మాత్రం పెనకచెర్ల డ్యాం నుండి వదలిన నీళ్ళతో చిన్న పాయగా ప్రవహించేది. వేసవి కాలం వచ్చిందంటే మాకు ఉదయాలు, సాయంత్రాలు నది ఒడ్డునే కాలక్షేపం. ఉదయం నదికి వెళ్ళి స్నానాలు చేసి భోగేశ్వర స్వామి గుడికెళ్ళి తర్వాత స్కూలుకు వెళ్ళేవాళ్ళం. మళ్ళీ సాయంత్రాలు ఆడుకోవటానికి నది తీరానికే. ఇక వర్షాకాలం వస్తే స్కూలుకు ఎటూ శెలువే కాబట్టి మళ్ళీ నదికే పరుగు. నదిలో ఈత కొట్టడం, పడవలు వదలటం, ఇసుకలో కబడ్డి ఆడటం మాకు ఇష్టమైన కార్యక్రమం. నది మధ్యలో కట్టిన చిన్న రామాలయం, ఆంజనేయ స్వామి గుడి శ్రీరామనవమి రోజున చాల సందడిగా ఉండేది. ఊరంతా సాయంత్రానికి అక్కడ చేరుకుని పండుగను ఉత్సాహంగా జరుపుకునేవారు. సంవత్సరానికి ఒక్కసారి నదికి అవతలి గట్టున ఉన్న రామేశ్వరుని దేవాలయానికి నడుస్తూ వెళ్ళటం కూడా నాకు బాగా గుర్తుంది. చిన్న ఊరు కావటం వల్ల ప్రతి ఒక్కరూ కావలసిన వాళ్ళే, బంధువులే.

మా ఊరికి ముఖ్య ఆకర్షణంటే భోగేశ్వర స్వామి ఆలయం. మా ఊరికి ఆ పేరు రావటానికి కూడా ఆ స్వామే కారణమంటారు. పామిడి నిజరూపం ’పాము ముడి’. లింగాకారంలో ఉన్న స్వామిని ఒక పాము ఎప్పుడూ చుట్టుకుని ఉండేదని, అందువల్ల ఆ ప్రదేశానికి పాము ముడి అని పేరు వచ్చిందని, కాల క్రమంలో అది పామిడి అయ్యిందనంటారు. స్వామి స్వయంభువని ఆ లింగం రోజు రోజుకీ పెరుగుతోందని నమ్మకం. నాకు సరిగ్గా తెలియదు. నేను హైస్కూలుకు రాగానే బెంగళూరుకు మకాం మారింది. తర్వాత నా విద్యాభ్యాసమంతా కర్ణాటకలో జరగటం, ఉద్యోగంలో మునిగి తేలుతూ చాలా సంవత్సరాల పాటు మా ఊరి వైపు వెళ్ళలేకపోయాను.

మొన్న ఇండియా వెళ్ళినప్పుడు ఆఫీసుకు 2 వారాల శెలువు పడేసి ఊర్లోనే ఉన్న చిన్నాన్న దగ్గరికి బయలుదేరాను. అనంతపురం దాటినప్పటి నుంచీ ఎప్పుడెప్పుడు ఊరు చేరుతానా అని ఎదురు చూస్తూ కూర్చున్నాను. కల్లూరు దాటిన వెంటనే పెన్నా నది మీద నుండి బస్సు వెళ్ళేది. బస్సు కిటకీనుండి నదిలో నీళ్ళు ఉన్నాయా లేవా అని చూసి, మరుసటి రోజు నది దండయాత్రకు బయలుదేరటం నా అలవాటు. బస్సు కల్లూరు దాటగానే పెన్నా ఇసుకతిన్నెల కోసం ఎదురుచూస్తున్నాను. ముళ్ళకంప చెట్లు దట్టంగా కనిపిస్తున్నాయి. ఇప్పుడొస్తుంది అప్పుడొస్తుందని ఎదురుచూస్తునే ఉన్నా. బస్సు పామిడి చేరుకున్నది. నేను నా కళ్ళను నేనే నమ్మలేకపోయాను. పెన్న కనిపించలేదు. నేనేమైనా పొరబడ్డానా అని సందేహపడ్తూ ఇల్లు చేరుకున్నాను. తర్వాత చిన్నాన్న ద్వారా తెలిసినదేమిటంటే ఇసుకంతా అక్రమంగా తరలిపోయిందని. తరలించటానికి ఇసుక లేకపోయాక భూమి ఆక్రమణలకు గురైయింది. మిగిలిన స్థలమంతా ముళ్ళకంపలతో నిండిపోయి జనం అడుగుపెట్టడానికి అసాధ్యం అయిపోయిందని. ఇక రాముని, ఆంజనేయిని గుళ్ళ గురించి అడిగే ధైర్యం చేయలేకపోయాను. ఇక అక్కడ ఉన్నన్ని రోజులూ చాలా విసుగ్గా గడిచాయి. బంధువుల ఇళ్ళకు వెళ్ళటం బాగానే ఉన్నా నేనెంతో సమయం గడిపే స్నేహితుడు కనిపించకుండా పోయాడు.

నా చిన్ననాటి ఙ్ఞాపకాలు శాశ్వతంగా మనిషి స్వార్థం వల్ల పోగొట్టుకున్నాను. భవిష్యత్తులో మళ్ళీ పెన్న గలగలలు వింటానన్న ఆశ కూడా లేదు. ఇక కేవలం పెన్న నాలాంటివారి ఙ్ఞాపకాల్లోనే ప్రవహిస్తుందా?

Happy New Year

2008-01-12T16:24:00.001-08:00

అందరికీ నూతన సంవత్సర శుభాకాంక్షలు.

తులిప్ పుష్పోత్సవం

2007-12-15T03:51:00.001-08:00

కెనడా దేశ రాజధాని అట్టావాలో జరిగే తులిప్ పుష్పోత్సవం చూడటానికి చాలా బాగుంటుంది. ఇక నేను చెప్పేదెందుకు మీరే చూసి చెప్పండి.

ఇలాంటి పూబాటలు ఇక్కడ కోకొల్లలు.

పూవుల అందాలను కెమరాలతోకాక కుంచెతో బంధిస్తున్న కళాకారులు.

కన్నుల పండుగే కాదు, వీనులవిందు కూడా

పార్లమెంట్ భవనం

పార్లమెంట్ భవనం దగ్గర ఉన్న నీరు-నిప్పు కలగలసిన ఫౌంటెన్ (తెలుగులో ఏమంటారో తెలిసినవారు చెప్పగలరు. వారికి నా ముందస్తు కృతఙ్ఞతలు)

ఇది కెనడా దేశపు మింట్. ఇక్కడ నాణేలను తయారుచేస్తారు. భారతదేశపు నాణేలు కూడా కొన్ని ఇక్కడ రూపొందించబడ్డాయి.

అట్టావా మ్యుజియం హాలు. ఇక్కడ మనిషి వివిధ రంగాలలో సాధించిన ప్రగతిని దశలవారీగా ప్రదర్శనకు ఉంచారు.

నయగారాల నయాగరా

2007-12-01T03:42:00.000-08:00

కెనడా, అమెరికా దేశాల సరిహద్దుల్లో ఉన్న సుందర జలపాతమే నయాగరా. దీని గురించి నేను చెప్పేకంటే నా ఫొటోలే బాగా చెపుతాయనుకుంటున్నాను. చూసి మీరే చెప్పాలి.

చలికాలం వణికిస్తోంది.

2007-11-26T13:53:00.000-08:00

మాంట్రియాల్ చలికాలం ప్రవేశించింది. సాయంత్రం 4 గంటలకే చీకటి పడుతోంది. మంచు కురవటం ప్రారంభమైంది. నదులు, సరస్సులు గడ్డ కడుతున్నాయి. ఉష్ణోగ్రత మైనస్ 12 డిగ్రీలను తాకుతోంది. మంచు కురిసిన తర్వాత తీసిన ఫోటోలు. ఎలా ఉన్నాయి?

సెల్ ఫోన్ సరిగ్గా వాడుతున్నామా?

2007-11-24T17:35:00.000-08:00

మనలో చాలామందికి సెల్ ఫోన్లు ఉన్నాయికాని వాటిని ఉపయోగించే విధానం మాత్రం కొద్దిమందికే తెలుసనిపిస్తుంది. నన్ను చిరాకు పెట్టిన సంగతేమిటంటే, వాటిని ఆఫీసులో ఉపయోగించే విధం. గంటల కొద్ది సమయం ఒక చేయి చెవికే అంటించేసి ఉంటుంది. ఆఫీసులో ఉన్నప్పుడు అంతసేపు పర్సనల్ విషయాలను ముచ్చటించుకోవటం అవసరమా అన్నది మనం నిర్ణయించుకోవాలి. ఇలా చేయటం వల్ల పని గంటలు వృధా కాదా?

మనలో చాలా మందికి ఉన్న అపోహ, ఫోన్ వస్తే దాంట్లో మాట్లాడటం తప్పదని. నిజంగానే అత్యవసర పరిస్థితుల్లో సెల్ ఫోన్ ఒక వరం. కాని వచ్చిన ప్రతి ఫోన్ కాలును పని మానుకుని మరీ తీసుకోవటం అవసరం లేదనుకుంటాను. నంబరు నోట్ చేసుకుని పనైంతర్వాత తీరిగ్గా ముచ్చటించుకోవచ్చు కదా?

ముఖ్యంగా మనం మన పని మానుకుని వేరేతని డెస్కు దగ్గర వెళ్ళి పని గురించి మాట్లాడేటప్పుడు అతనికి మధ్యలో ఫోన్ వస్తుంది. అది అతని స్నేహితుడు శుక్రవారం ఏ సినిమాకు వెళదామని అడగడానికో, మందు పార్టీ గురించో అయ్యుంటుంది. ఇతనేమో ’పనిలో ఉన్నాను, మళ్ళీ మాట్లాడత'నని అనకుండా అప్పుడే హస్కు వేసుకుంటాడు. అతని అత్యవసర సమావేశం అయ్యేదాక వేచి చూడాలి. అరికాలి మంట నెత్తికెక్కేదెప్పుడంటే, అతను ఫోన్ తాపీగా పెట్టేసి ’ఆ ఎక్కడున్నాం’ అనో ’సరే... ఇప్పుడేం చేద్దాం’ అని అన్నప్పుడు. అంతవరకు చెప్పిన దాన్నే మళ్ళీ రికార్డు వేయాలంటే ఎంత చిరాగ్గా ఉంటుందో చెప్పలేను. ఇలా చేయటం వల్ల ముగ్గురి సమయం వృధా అయ్యిందన్న ఇంగితం కూడా ఉండదు. బహుశా నేనూ కూడా పట్టించుకునేవాడిని కానేమో. కాని ఇక్కడ ఆఫీసు పధ్ధతులు చూసాక నాకు ఈ టపా వ్రాయాలనిపించింది. ఇక్కడ ఒక మనిషి మనవద్ద వచ్చి మాట్లాడుతున్నప్పుడు తమ సమయాన్నంతా అతనికే కేటాయిస్తారు. అతను చెప్పేదాన్ని శ్రద్ధగా వింటారు. మధ్యలో ఫోన్ వస్తే (సెల్ ఒకటే కాదు, ఆఫీసు ఫోన్ అయినా సరే) అది పర్సనల్ అయితేనో, ముఖ్యమైనది కాకపోతే, చేసిన వారి నంబరు నోట్ చేసుకుని కట్ చేసేస్తారు. ముఖ్యమైన కాల్ అయితే వీలైనంత త్వరగా ముగించి, క్షమాపణలు అడిగి సంభాషణ కొనసాగిస్తారు. మనం కూడా ఇలాంటి విషయాలను శ్రద్ధ తీసుకుని పాటిస్తే బాగుంటుంది. ఏమంటారు?

మాంట్రియాల్ కబుర్లు 1

2007-11-19T15:46:00.000-08:00

సెయింట్ లారెన్స్ నది మధ్యలో ఉన్న సుందర ద్వీపనగరమే మాంట్రియాల్. యూరప్ బయట ఫ్రెంచ్ సంస్కృతికి ప్రధాన నగరంగా భాసిల్లుతోంది. చుట్టూ విశాలమైన నది ప్రవాహం కన్నుల పండుగ చేస్తూ జెట్ బోటింగ్ లాంటి క్రీడలకు ఆహ్వానిస్తుంటే, చిన్న చిన్న ద్వీపాలలో ఉండే అమ్యూజ్మెంట్ పార్కులు ఆటలాడుకోవటానికి ఉత్సాహపరుస్తాయి. ఇక సేదతీరటానికి ఉద్యానవనాలు సరేసరి. మాంట్రియాల్ కెనడా దేశపు క్వీబెక్ (Quebec) ప్రావిన్స్ కు చెందుతుంది మరియు కెనడా నాలగవ పెద్ద నగరంగా గుర్తించబడుతోంది.

వేసవి ఆటవిడుపుగా మాంట్రియాల్ నగరానికి గొప్ప పేరుంది. సూర్యకాంతి ఎక్కువసేపుండటం బాగా కలసి వచ్చే విషయం. వేసవిలో సూర్యుడు ఉదయం 5 కన్నా ముందే ఉదయించి రాత్రి 9.30 దాటాకగాని అస్తమించకపోవటంతో వేసవిలో ప్రతిరోజూ తిరునాల జరుగుతున్నట్లుంటుంది. వివిధ రకాల పండుగలతో, పెరేడ్లతో నగర ప్రధాన వీధి సెయింట్ కాథరిన్ మహా సందడిగా ఉంటుంది. ఒలంపిక్ స్టేడియం, బయోడోమ్, మౌంట్ రాయల్ లాంటి ముఖ్యప్రదేశాలే కాక మరెన్నో చూడదగ్గ ప్రదేశాలతో పర్యాటకులను అలరిస్తుంది.

ముఖ్యంగా బయోడోమ్ పిల్లలకు నచ్చుతుంది. ప్రపంచంలోని వివిధ రకాల అటవీ వాతావరణాలను ఇక్కడ కృతిమంగా సృష్టించారు. సముద్రపు వాతావణాన్ని, tropical, polar వాతావరణాలను, అక్కడ నివసించే చెట్లను, పక్షులను, జంతువులను ఇక్కడ ఉంచారు. నాకు బాగా నచ్చిన వాటిలో ఇది ముఖ్యమైనది.

మాంట్రియాల్ మరో ప్రధాన ఆకర్షణ Old Port . ఇది పురాతన ఫ్రెంచ్ సంస్కృతిని ప్రతిబింబిస్తుంది. పడవపై విహార యాత్రలకు చాలా బాగుంటుంది. పురాతన కట్టడాలు ఈ ప్రాంతపు ప్రత్యేకత. ఇక చెప్పడమెందుకు చూసి ఆనందించండి. మరోసారి మరిన్ని విశేషాలతో..
ఇదే బయో డోమ్. చూడటానికి చిన్నదిగా కనిపించినా, సమస్త ప్రపంచాన్ని కళ్ళకు కట్టినట్లు చూపిస్తుంది. వృక్ష, ప్రాణి, పక్షి ప్రపంచాలతో పాటు జల ప్రపంచం కూడా ఇక్కడ చూడ వచ్చు.

నాకు నచ్చిన ఫోటోల్లో ఇదొకటి. బాగుందా?

ఒలంపిక్ స్టేడియంనుండి మాంట్రియాల్ నగర దృశ్యం.

ఇదే ఒలంపిక్ స్టేడియం టవరు.

ఇక మిగిలినవి Old port దృశ్యాలు. మన సాంస్కృతిక నగరాలు కూడా ఇలా పరిశుభ్రంగా, అహ్లాదకరంగా ఉండాలన్నదే నా ఆశ.

ఇలాంటి గుర్రపుబళ్ళు ఎక్కి పాత నగరాన్ని ఎంచక్కా తిరిగేయొచ్చు. మరి వస్తారా???

డబ్బు గురించి...

2007-11-11T05:12:00.000-08:00

దీపావళి పండుగ బాగా జరిగిందనుకుంటాను. టపాసులు బాగా కాల్చారా? నా వరుకు నేను దీపాలు వెలిగించి, పిండి వంటలు చేసుకుని, భక్తి సినిమాలు చూసి పూర్తిచేసాను,

సరే ఇక విషయానికొస్తే, భారతదేశంలో ఆర్థిక సంస్కరణల గురించి, పెరుగుతున్న సెన్సెక్స్ గురించి బోలెడన్ని కబుర్లు వార్తల్లో వస్తుంటాయి కదా? వాటి గురించే అప్పుడప్పుడు నా మనుసులో ఉన్న కొన్ని సందేహాలు. నాకు ఈ షేర్ మార్కెట్ల గురించి తెలియదు. నాకు సంబంధించినంతవరకు ఎకనామి అంటే నా జీతం, దాన్ని నేను ఖర్చు చేసే విధానం. సెన్సెక్స్ దూసుకుపోతోందని చిదంబరంగారైతే సంబర పడిపోతున్నారుగాని, దానికంటే వేగంగా పెరిగే ధరల సూచి నన్ను దిగాలు పెడుతున్నది. సెన్సెక్స్ పెరుగుదల వల్ల నా జీతం పెరిగిందో లేదో తెలియదుగాని, ధరల పెరుగుదల వల్ల నా జేబుకు చిల్లులు పడుతున్న సంగతి మాత్రం బాగా తెలుస్తున్నది.

ఎవరిని ఉద్దేశించి ఈ ఆర్థిక సంస్కరణలు మొదలు పెట్టారో వారికి వాటి ఫలాలు అందుతున్నాయా అనది ప్రశ్న. ఉదాహరణకు ఇక్కడ ఆహార ఖర్చు జీతంలో 7 శాతం కాగా ఇండియాలో 12 శాతం. ఆహార స్వయం సమృద్ధి సాధించామనే దేశంలో ఇలాంటి పరిస్థితి ఎందుకో? పండించిన రైతు సరైన ధర లేక చస్తుంటే, మార్కెట్లో ఉన్న ధర పెట్టి కొనలేక మనం చస్తున్నాము. ఇక్కడ పెట్రోలు ధర లీటరుకు రమారమి 40-42 (రూపాయల్లో) ఉంటే, ఇండియాలో 50 పైమాటే. అయినా ప్రభుత్వం సబ్సిడి ఇవ్వలేక సతమతమవుతుంది, పెట్రోలియం కంపెనీలు నష్ట పడతాయి. ఏమిటో ఈ ’చిదంబర’ రహస్యం. చమురు మీద రూపాయి టాక్సు పెట్టి, పది పైసల సబ్సిడి ఇచ్చే విధానాల వల్ల ఉపయోగం లేదు. ప్రభుత్వం ధరలను అదుపులో పెట్టగలిగితే ప్రజలు ఆదాయ పన్ను ఎగ్గొట్టటం తగ్గుతుందేమో?

ఇక ముక్త విఫణి గురించి. ఆర్థిక సంస్కరణల వల్ల ముక్త విఫణి ఏర్పడి ప్రజలకు దానివల్ల మంచి జరిగిన మాట నిజం. లేకపోతే ఇంకా మారుతి కార్లు ఓ పాతికవేలు ఎక్కువ ధర ఉండేవి. ఇప్పుడు మనకు ఏమి కొనాలన్నా బోలెడంత చాయిస్. కాని రెండు నెలల క్రితం నేను ఇండియా వెళ్ళినప్పుడు గమనించిన విషయం చాలా బాధపెట్టింది. మీరెప్పుడైనా సూపర్ మార్కెట్ల ధరల గురించి ఆలోచించారా? వారి ధరలు ఇక్కడి ధరలతో పోటీ పడుతుంటాయి. మన్నిక కూడా అంతంత మాత్రం. ఇక్కడ కొన్ని షాపుల్లో Expiry date దగ్గర పడ్డ వస్తువులను తక్కువ ధరకు, ఒక్కోసారి సగం ధరకు అమ్ముతారు. ఎలెక్ట్ర్రానిక్ వస్తువులైతే ధరల తగ్గుదల నుండి రక్షణ ఉంటుంది. అంటే వస్తువు కొన్న తర్వాత నిర్ణీత సమయంలో వస్తువు ధర తగ్గితే, తగ్గినంత మేర డబ్బును మీకు బిల్లు చూపితే వెనిక్కిస్తారు. ఇలాంటి సదుపాయం మనకు ఉన్నదా? అడ్విటైజ్ మెంట్లో లేని షరతులు షాపుకొచ్చాక చెప్పటం, లేకపోతే స్టాకు అయిపోయిందనటం వినియోగదారుల నమ్మకాన్ని పోగొడతాయి. కొన్ని సూపర్ మార్కెట్లు సామాన్లు టోకున కొంటే తక్కువ ధరకిస్తామని ప్రచారం చేస్తుంటాయి. మనం టోకున కొనేలాగుంటే మన వీధి చివరనుండే అంగడతను కూడా ఆ మాత్రం తగ్గింపు ఇవ్వగలడు. ఆలోచించండి. ఇలాంటి మార్కెట్లకు ఇచ్చే ప్రోత్సాహం భావ్యమా?

చివరగా చిన్న విషయం. దీపావళి పండుగ సందర్భంగా జైనులు గోపూజ చేయటం టీ.విలో చూపారు. కొద్దిమంది ఆవులకు బన్నులు, అరటి పళ్ళు పెట్టటం చూసాను. వాటిని ఏ పేదవారికో పంచి ఆవులకు గడ్డి పెడితే రెండు విధాలుగా పుణ్యం దక్కేదేమో ఆలోచించగలరు.

మన డబ్బు మనం ఇష్టమొచ్చినట్లు ఖర్చు పెట్టుకోవచ్చు. కాని, ఆ చేసే ఖర్చు మనకేకాకుండా సాటివారికి, దేశానికి, పర్యావరణానికి సహాయకారిగా ఉంటే అంతే చాలు. అందరికీ లక్ష్మీ కటాక్షం కలుగుగాక.

దీపావళి శుభాకాంక్షలు.

2007-11-08T15:20:00.000-08:00

అందరికీ దీపావళి శుభాకాంక్షలు. ఈ దీపావళి మీ అందరి జీవితాల్లో వెలుగులు నింపాలని హృదయపూర్వకంగా ఆకాంక్షిస్తున్నాను.

ನಿಮಗೆಲ್ಲರಿಗೂ ದೀಪಾವಳಿ ಹಬ್ಬದ ಶುಭಾಶಯಗಳು. ಈ ದೀಪಾವಳಿ ಹಬ್ಬ ನಮ್ಮೆಲ್ಲರ ಜೀವನದಲ್ಲಿ ಹರುಷ ತರಲೆಂದು ಹೃದಯಪೂರ್ವಕವಾಗಿ ಬಯಸುತ್ತಿದ್ದೇನೆ.

బియ్యం బాధ

2007-11-07T15:25:00.000-08:00

మళ్ళీ కల్సుకున్నందుకు సంతోషం. దీపావళి సందడి మొదలై ఉంటుందనుకుంటాను. ఇండియాలో ఉంటే బాగుండేది. టపాసులు కాల్చుకునేవాడిని. ఇక్కడ చలికి బిగిసుకుపోతున్నామంటే నమ్మండి.

అన్నట్లు ఆంధ్రాలో వరికి వెయ్యి రూపాయలు మద్దతు ధర ఇవ్వాలని గట్టి ప్రయత్నాలు జరుగుతున్నాయని వార్త. వెయ్యి ఇస్తే వినియోగదారుడికి కిలో బియ్యం ధర 20-25 రూపాయలకు పెరుగుతుందని ప్రధాని బాధ. మరి గోధుమ విషయంలో ఎంత ధర పెరిగిందో ఏ వార్తా పత్రిక కూడా చెప్పలేదు. ఎవరికైనా తెలిస్తే చెప్పగలరు. ఐనా ధరల అదుపు ప్రభుత్వ బాధ్యత కాదా? ఏది ఎలా ఐనా మధ్యలో పభుత్వం బియ్యం ఎగుమతి ఆపినందువల్ల ఇక్కడ మాకు బియ్యం కరువు ఏర్పడి ధర రెండింతలైంది. మరి మా బాధ ఎవరికి చెప్పుకోము? అన్నం తప్ప బర్గర్లు తిని బ్రతకడం ఇంకా నేర్చుకోలేదు. ఇక తప్పదనుకుంటా.

సరే ఇక విషయానికి వస్తే, ముందుగా ఇక్కడ ఆకట్టుకునేది రహదారుల మీద క్రమశిక్షణ. హారన్ మోత ఎప్పుడోగాని వినపడదు. నిదానంగా వెళ్ళే వాహనాలు ఒక లేన్లో వెళ్తుంటే, వాటి దాటుకుని వెళ్ళే వాహనాలు పక్క లేన్ వాడుకుంటాయి. మన దేశంలో కూడా అలా చేయకుండా ముందున్న వాహనం తప్పుకునేదాకా హారన్ మోగిస్తూ చిరాకు పెడ్తుంటారు. రోడ్లు కూడా బాగుంటాయి. గంటకు 120 కి.మి. వేగంతో కూడా కుదుపులు లేకుండా ప్రయాణించవచ్చు.

మాంట్రియాల్ నగరంలో ఎక్కువగా మాట్లేడేది ఫ్రెంచ్. సిటిలో అయితే ఇంగ్లీష్ అర్థం చేసుకుంటారుగాని కొంచెం లోతట్టు ప్రాంతాలకు వెళ్తే ఫెంచే గతి. కాని, ఎవరినైనా చిరునవ్వుతో పలుకరించే జనం. ఉరుకులు, పరుగులకు దూరంగా ఉన్న జీవన శైలి మనల్ని ఇబ్బంది లేకుండా చూస్తాయి. జనంతో కలసి పోవడం చాలా తేలిక. నగరానికి దూరంగా ఉన్న ఊళ్ళు మన పల్లెలను పోలి ఉంటాయి. పేరుకు పల్లెలేగాని అన్ని వసతులు ఉంటాయి. 24 గంటలు ఉండే కరెంట్, నీరు గమనించవలసిన మరో విషయం.

సరే మళ్ళీ కలుసుకున్నప్పుడు మరిన్ని విషయాలు.

మరొక ముఖ్య విషయం, తెలుగులో వ్రాయడానికి లేఖినిలాగే పనిచేసే మరొక తంత్రాశం బరహ. బరహ IME వాడుకుని ఎక్కడైనా తెలుగులో వ్రాసుకోవచ్చు. బ్రౌజర్ తో పని లేదు. వివరాలకు వెబ్ సైట్ చూడండి. www.baraha.com

నా పరిచయం

2007-11-04T17:14:00.000-08:00

ముందుగా నా పరిచయం,

నా పేరు రాజశేఖర్. నేను వృత్తిరిత్యా మెకానికల్ ఇంజనీరుని. నా ప్రస్తుత నివాసం కెనడాలోని మాంట్రియాల్. అలాగని ఎన్.ఆర్.ఐ కాను. అందరిలానే ఉద్యోగం కోసం ఇక్కడ వచ్చాను. ఆన్సైట్ అన్నమాట. ఇండియాలో నా ఉద్యోగం బెంగళూరులో. ఇది టూకీగా నా పరిచయం.

ఇప్పుడు ఈ బ్లాగెందుకయ్యా అంటే, నా గురించి నేను చేప్పుకోవటానికి, నా ఆలోచనలను అందరితో పంచుకోవటానికినూ. అందరిలాగానే నాకు కూడా బోలెడన్ని ఆశలూ, వాటి గురించి ఆలోచనలూ ఉన్నాయి. అంతేకాక అప్పుడప్పుడు సమాజం గురించి కూడా ఆలోచిస్తానన్న మాట. వాటన్నిటినీ ఇక్కడ అక్షర రూపం ఇవ్వటమే ఈ బ్లాగు ఉద్దేశం. సో, ఇక నా మనుసులో వచ్చిన వింత వింత ఆలోచనలు, ఊహలూ, అనుభూతులు చదవడనికి సిద్ధంగా ఉండండి.

సాధారణంగా ఉద్యోగంలో ఉన్నవారికి ఇష్టమైన టాపిక్ బాస్ మరియు ఆఫిస్. కెనడా ఆఫిస్ చాలా బాగుంటుంది. నిజం చెప్పాలంటే ఇక్కడి పని వాతావరణం చాలా బాగా నచ్చింది. పని మధ్యలో ఎవరూ వచ్చి దిస్టర్బ్ చేయరు. ప్రశాంతంగా పనిచేసుకోవచ్చు. బహుశా ఇదే కావచ్చు నన్ను ఇక్కడ ఇంత కాలం ఉంచింది. ముఖ్యంగా సమయాన్ని ఎలా ఉపయోగించుకోవాలో ఇక్కడ నేర్చుకోవాలి. మధ్యాహ్నం కాఫి తాగుతూ బయట కిటకీలోనుండి రంగులు మారుతున్న చెట్లనూ, మంచుకు సిద్ధమవుతున్న అడవిని చూడటం నాకెంతో ఇష్టం. ఇంత ప్రశాంతంగా ఉంటుందని బెంగళూరులో ఎవరైనా అంటే నమ్మే వాడిని కాను. ముందుగా నేను మీతో ఇక్కడ గమనించిన మంచి విషయాలను పంచుకోవాలనుకుంటున్నాను.

మళ్ళీ కలిసినపుడు మరిన్ని విషయాలు.

Welcome

2007-11-04T06:44:00.000-08:00

నా మొదటి బ్లాగుకు స్వాగతం